asdas
ცნობილი ადამიანები
ციცი ფალავანდიშვილი უკრაინელი რძლისთვის უწიწაკო კერძებს ცალკე აკეთებს
კულინარიული შედევრები
ციცი ფალავანდიშვილი უკრაინელი რძლისთვის უწიწაკო კერძებს ცალკე აკეთებს

2014-12-01 01:21:45



მუსიკოსმა ციცი ფალავანდიშვილმა, ოჯახისთვის სადილების მზადება რასაც ჰქვია, 45 წლის ასაკში დაიწყო და მას შემდეგ ყველას აოცებს თავისი ნახელავით. ბოლო დროს კულინარიულ ექსპერიმენტებსაც მიმართავს, რაც ძალიან მოსწონთ მის შვილს, ჯგუფ "მგზავრების" სოლისტ გიგი დედალამაზიშვილს და უკრაინელ რძალს, ფოტოგრაფ მარინა კარპს. თუმცა ცხობა ქალბატონ ციცის არ უყვარს, რადგან ცომეული წონისთვის სახიფათოა. სამაგიეროდ ლიქიორების დაყენების ძველ და მივიწყებულ "ხელოვნებას" ფლობს.
რა თქმა უნდა, ქალბატონ ციცისთან ინტერვიუდან გემრიელი რეცეპტების გარეშე არ წამოვსულვართ.
– ქალბატონო ციცი, გიყვართ სამზარეულოში ფუსფუსი?
– მიყვარს, მაგრამ ვერ გეტყვით, რომ ბავშვობიდან სამზარეულოში ვტრიალებ. სანამ დედა და მამა ცოცხლები იყვნენ, სადილებს არ ვამზადებდი. ბაზარი სად იყო, ეგეც არ ვიცოდი. როცა დედას ეუბნებოდნენ, რა არის, ციციმ არაფრის გაკეთება იცისო, პასუხობდა, იცის, რადგან ყოველთვის მიყურებს, როგორ ვამზადებო. მერე აღმოჩნდა, რომ დედა თავის რეცეპტებს რვეულში წერდა, მარილის დოზებიც კი მითითებული ჰქონდა. ალბათ იცოდა, რომ დამჭირდებოდა.
– დედის ტრადიციების ღირსეული გამგრძელებელი გახდით?
– ამბობენ, რომ კარგი ხელი მაქვს. ჩვენს სახლში თითქმის ყოველდღე სტუმრები არიან, მიყვარს მათთვის გემრიელად გამასპინძლება. ეს ჩემთვის რიტუალია, რის გამოც შვილები, ნინი და გიგი, დამცინიან.
როცა სტუმარი ჩემ მიერ მომზადებულ კერძს სინჯავს, გაფაციცებით ვაკვირდები, რა რეაქცია აქვს, მოსწონს თუ არა. როცა მეუბნებიან, კარგიაო, ძალიან ბედნიერი ვარ. დედაჩემის მომზადებულ კერძს რომ სინჯავდნენ და მოწონებას გამოთქვამდნენ, იტყოდა ხოლმე, ახლა დავისვენეო. მიკვირდა, ამას რატომ ამბობდა, მაგრამ ახლა მეც ანალოგიურად ვიქცევი. როცა ჩემი ოჯახის ყველა წევრი დაპურებული მყავს, კმაყოფილების შეგრძნება მეუფლება.
– ტრადიციულ კერძებს აკეთებთ, რომელთა რეცეპტები ყველასთვის ცნობილია თუ თქვენი გემოვნებითაც უმატებთ ინგრედიენტებს?
– ბოლო დროს დიდი ექსპერიმენტების კეთება დავიწყე და ძალიანაც მომწონს. ამას წინათ უცნაური კერძი გავაკეთე. სტუმრები გვყავდა და ყველას მოეწონა. გიგი გიჟდება ამ კერძზე, მარინასაც და ნინისაც ძალიან უყვართ.
– ჩვენც გვასწავლეთ "უცნაური" კერძის მომზადება.
– უნდა აიღოთ ქათმის ერთი კილო ფილე. ოდნავ მოხარშავთ, შესაწვავად გაამზადებთ. შემდეგ ნაჭრებად დაჭრით, ძალიან ცხარე აჯიკაში ამოავლებთ და შეწვავთ. რომ შეიწვება, ტაფაზე დაასხამთ წყალს და ხორცს წამოადუღებთ. ცალკე წყალში ჩაალბობთ ერთ მუჭა გარგრის ჩირს, ცოტა ქიშმიში დაგჭირდებათ და შავი ქლიავის ჩირი, მაგრამ მე ბოლოს რომ გავაკეთე, ცოცხალი ქლიავი ვუქენი. გარგრის ჩირს 15 წუთი ადუღებთ, შემდეგ ქიშმიშს ჩაამატებთ და ისევ 10 წუთი ადუღებთ, ბოლოს – არაჟანი და მარილი გემოვნებით. ტკბილ–მწარე გემო აქვს, ძალიან გემრიელია.
– ყურადღებას აქცევთ, რომ ოჯახში სწორი კვება გქონდეთ?
– მაინცდამაინც არ გამომდის. ნინი რაციონს თავად იდგენს. გიგი სხვა რიტმში ცხოვრობს, როცა ახერხებს, მაშინ ჭამს, მაგრამ ძალიან უყვარს სახლში სადილობა. ის დიდი ხანია პურს აღარ ჭამს, ნინის და ჩემს ქმარს კი პური ძალიან უყვართ. ვცდილობ, გაზიანი სასმელები საერთოდ ამოვიღო ჩვენი რაციონიდან და სახლში არასოდეს გვქონდეს. არც დაკონსერვებული კომპოტები მიყვარს. ცოცხალი ხილის კომპოტს ვაკეთებ ხშირად.
– თქვენს უკრაინელ რძალს შეუყვარდა ქართული კერძები?
– მარინა გურმანია. საერთოდ ოჯახში პრეტენზიული მჭამელები არ მყავს, მაგრამ მაინც მიწევს სხვადასხვანაირი კერძების მომზადება, რომ ის ჭამონ, რაც უფრო მეტად უყვართ. ყველას გემოვნებას ვითვალისწინებ.

– მარინამ ისწავლა ქართული საჭმელების მომზადება?

– კი და მეც ვისწავლე უკრაინული კერძების მომზადება. მარინას დედა შესანიშნავი კულინარია, მან მასწავლა სოკოს სუპი.
– მოდით, თქვენ ჩვენ გვასწავლეთ ამ სუპის რეცეპტი.
– აიღეთ ნახევარი კილო ქამა სოკო და ზეთთან და ხახვთან ერთად ჩახრაკეთ. ცალკე მოხარშეთ წვრილად დაჭრილი კარტოფილი და მოხრაკულ სოკოში ჩაყარეთ. გახეხეთ ერთი დიდი სტაფილო და ისიც ჩაუმატეთ. ბოლოს კი მდნარი ყველი დაამატეთ. მარილი გემოვნებით და ცოტა კამა. ძალიან გემრიელია.
– თქვენი ოჯახის მამაკაცებს რაიმე განსაკუთრებული მოთხოვნები ან პრეტენზიები არ აქვთ საჭმლის თაობაზე, აკმაყოფილებთ საოჯახო მენიუ?
– ბედნიერი ვარ, რომ ჩვენი ოჯახის მამაკაცები არ ამბობენ, ქალი ვიცით მხოლოდ "კუხნაშიო". ან რატომ უნდა გამოთქვან პრეტენზია, როცა ოჯახში სადილი სულ გვაქვს? არც გიგი არის მარინას მიმართ პრეტენზიული, არასოდეს ეუბნება, სახლში ეს საჭმელი რატომ არ არისო. ჩემი ქმარიც სწორედ ასეთია. გიგის და ნინის მეგობრები რომ მოდიან, კითხულობენ, რამე გემრიელი თუ გვაქვსო. ამ დროს ბედნიერი ვარ. ვფიქრობ, ნეტა, დედა და მამა ხედავდნენ, როგორი კულინარი დავდექი–მეთქი.
გიგიმ მარინა რომ მოიყვანა ცოლად, ჩემმა რძალმაც იკითხა, რა გავაკეთოო. ვუთხარი, თუ ჩემი მომზადებული მოგწონს, ჭამე, თუ არა, რაც გინდა, ის გააკეთე–მეთქი.
– ცხობაც ასე კარგად გეხერხებათ?
– დიდი ხანია აღარაფერი გამომიცხვია, მეშინია, მგონია, რომ ხაჭაპური არ გამომივა. ჩვენ გვერდით არის საცხობი, ვიცი, რომ სუფთად, გემრიელად აცხობენ და ამიტომ ყიდვა მირჩევნია. თან ისიც ვიცი, რომ არ არის აუცილებელი, გავსუქდეთ. რომ გამოვაცხო, ძალაუნებურად უნდა ვისუსნაო კიდეც და ამიტომ სულ არ ვაცხობ.
– თქვენი რეცეპტებიდან კიდევ რას გაგვიმხელდით?
– დედაჩემის რეცეპტს გასწავლით. ჩემს ქმარს დიდად არ უყვარს აჯაფსანდალი, ამიტომ ამ ხერხს მივმართე: დამარილებულ დაჭრილ ბადრიჯანს შეწვავთ. ზეთში ცალკე მოხრაკავთ ხახვს, პომიდორს, ბულგარულ წიწაკას, დაამატებთ დანაყულ ნიორს, მწვანე წიწაკას და მწვანილს – ოხრახუში, ქინძი, ცოტა კამა და რეჰანი. მწვანილის ნაწილს ამ მასაში მაშინვე ჩააყრით და ნაწილს ცალკე შეინახავთ. ბოლოს ბადრიჯანს მოასხამთ ამ მოშუშულ მასას, შემდეგ ზემოდან ისევ ბადრიჯანს დაალაგებთ, ისევ მოასხამთ, ზემოთ კი დარჩენილ მწვანილს მოაყრით. ძალიან გემრიელი საჭმელია.
– ცხარე კერძები თქვენს ოჯახში პოპულარულია?
– მარინას დიდად არ უყვარს, ამიტომ ორნაირს ვაკეთებ, ცხარეს და ნაკლებად ცხარეს. გიგიც სოლიდარობას უცხადებს და არც ის ჭამს ცხარეს. მე ძალიან მარილიანი არ მიყვარს, მათ უყვართ.
– ბაზარში სიარულიც თქვენს თავზე გაქვთ აღებული?
– ეს ჩემთვის ყველაზე მტკივნეული თემაა. მეუბნებიან, რა გინდა, დაგვაბარე და მოგიტანთო, მაგრამ მგონია, რომ იმას ვერ მომიტანენ, რაც მინდა. ამიტომ სულ მე დავდივარ. ძირითადად ერთი და იმავე ადამიანებისგან ვყიდულობ რძის ნაწარმს. ისინი კარგად ერკვევიან ჩემს გემოვნებაში.
– ოჯახურ ვახშამს ხშირად აწყობთ?
– აბა, რა! ოჯახი რომ ვიკრიბებით, 12 კაცი ვართ. მართალია, ყოველდღიური სახე არ აქვს ჩვენს ერთად ვახშმობას, რადგან ყველას სხვადასხვა რეჟიმი აქვს, მაგრამ მაინც ვახერხებთ.
– თქვენს ქალიშვილს ნინის თუ გამოჰყვა დედისა და ბებიის ნიჭი?
– მშვენივრად ამზადებს. ყველას ყველაფერს ვუწონებ. თუკი ვინმე რამეს ამზადებს, ყველას ვეუბნები, გადასარევია–მეთქი. თუ ნინის სურვილი არ ექნება, ნუ გააკეთებს, მე გავაკეთებ, რა პრობლემაა?
– ალკოჰოლიდან რა გიყვართ პირადად თქვენ?
– არაჩვეულებრივ ლიქიორებს ვაკეთებ, მაგრამ ნაკლებად გეახლებით. შემიძლია ყავის ლიქიორის მომზადება გასწავლოთ:
24 ჩაის კოვზ ხსნად ყავას დაასხამთ 3 ჭიქა ადუღებულ წყალს და მთელი ღამე გააჩერებთ. დილით მარლაში გაწურავთ და დაუმატებთ 3 ჭიქა შაქარს, მოადუღებთ იქამდე, ვიდრე სიროფს მიიღებთ. რომ გაცივდება, დაამატებთ არაყს ან სპირტს. აუცილებლად უქენით ვანილი.
ქეთი დინოშვილი, ჟურნალი სარკე 


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521704
1521904 online