asdas
ცნობილი ადამიანები
დავით ლორთქიფანიძე: ისინი, ვინც ივანიშვილს აგინებდა, თანამდებობებზე დანიშნეს
”ქართული ოცნების” გასუფთავება დაიწყო
დავით ლორთქიფანიძე: ისინი, ვინც ივანიშვილს აგინებდა, თანამდებობებზე დანიშნეს

2014-10-30 19:46:08



რას დაპირდა ზვიად ჯანყარაშვილი ”ქართული ოცნების” წევრებს, ვინ დაინიშნა დაუმსახურებლად თანამდებობზე, რატომ გადაწყვიტეს ნაციონალებმა ქუჩაში გამოსვლა? ამ თემებზე ”ახალ თაობას” დეპუტატი დავით ლორთქიფანიძე ესაუბრება.

დავით ლორთქიფანიძე: _ ნაცმოძრაობას ქუჩაში გამოსვლის სურვილი რამდენიმე გარემოებამ გაუჩინა. ისინი კარგად გრძნობენ მოახლოებულ საშიშროებას. დიდი ალბათობით დამნაშავეთა ბანდა პოლიტიკური ავანსცენიდან გაქრება. ამის გარდა, ნაციონალებს აქვთ ძალიან დიდი ფული, რომელიც მათ არ ასვენებს. ამ ფულით საქართველოს ხელისუფლების დისკრედიტაციას ეწევიან, მოდებული არიან ამერიკას და ევროპას. ხელისუფლებაში ყოფნის დროს ბევრი კეთილმოსურნე შეიძინეს. ახლა ამ ადამიანებს ნაცმოძრაობა თავის სასარგებლოდ იყენებს. მათ თავის გადარჩენა და ტივტივას როლში ყოფნა სურთ. იმისათვის რომ ყურადღების ცენტრში იყვნენ არაფერზე უკან არ იხევენ. სხვადასვა თემებს ედებიან. ახლა აქციის მოწყობა მოინდომეს. სწორედ მაგათზეა ნათქვამი ენას ძვალი არა აქვსო. ამის გარდა შუბლის ძარღვიც გაიწყვიტეს და ყველაფერზე მიდიან.

_ ამჯერად ისინი აფხაზეთის დასაცავად გამოდიან.

_ არ მჯერა მაგათი ლოზუნგების და არც იმის რომ ქვეყანაზე ზრუნავენ. რამდენიმე დღის წინ ყველამ ვიხილეთ მიხეილ სააკაშვილის ინტერვიუ. სადაც ის ათას რამეს მოედო. გაიძაძოდა ქართველი ხალხი ტერორისაგან უნდა გავათავისუფლოო. ეგ რომ ტერორზე დაიწყებს საუბარს ხომ დიდი სირცხვილია. ჯერ კიდევ 2 წლის წინ ისინი გაუგონარ საშინელებებს სჩადიოდნენ. საბედნიეროდ ხალხს კარგი მახსოვრობა აქვს და ყველაფერი კარგად ახსოვს. ყოფილ ხელისუფლების წევრებს, როგორც უკვე გითხარით, ახლა თავის გადარჩენა უნდა და ყველაფერზე მიდიან. მაგრამ არაფერი არ გამოუვათ. პოლიტიკური ავანსცენიდან მათი გაქრობა გარდაუვალია.

_ რატომ გგონიათ, რომ გაქრებიან, მათ მხარდამჭერები საკმაოდ ჰყავთ.

_ მხარდამჭერები მართლაც ჰყავთ. ზოგი მათგანი შეცდენილია, ზოგიც იძულებული მხარი დაუჭიროს დამნაშავეთა ბანდას. ჩვენ ამ ადამიანების ნაცმოძრაობის მხარდაჭერას ნამდვილად არ დავუშლით. თუ ასე ძალიან მოსწონთ ნაციონალები იდგნენ მათ გვერდით. ჩვენ ძველი რეჟიმისგან იმითაც განვსხვავდებით რომ განსხვავებული პოლიტიკური შეხედულებების გამო ადამიანებს არც ვდევნით, არც ციხეებში ვყრით და არც ქონებას არ ვართმევთ. ეს დემოკრატიის სურნელი ნაციონალებმაც იგრძნეს და ახლა მაქსიმალურად ცდილობენ ქუჩაში გადაიტანონ პროცესები.

_ მათ მიერ დაანონსებულ აქციას რამდენიმე ოპოზიციური პარტიაც უერთდება. ამაზე რას ფიქრობთ, ისინიც თავის გადარჩენას ცდილობენ?

_ მოდით, რამდენიმე წლის წინანდელი პერიოდი გავიხსენოთ, კერძოდ ის პერიოდი როცა ბიძინა ივანიშვილი პოლიტიკაში მოვიდა. პირველად მან წერილი გამოაქვეყნა. სადაც ის ამბობდა რომ შუა უნდა გაიკრიფოსო. მისი აზრით, პარტიების ნაწილი ნაცმოძრაობის დავალებების შემსრულებლენი იყვნენ. ეს პარტიები მაშინაც ნაცმოძრაობის საქმეს აკეთებდნენ და ახლაც მათ დაძახილზე გამოდიან ქუჩაში. მგონია რომ ისინი უბრალოდ იძულებული არიან ნაცმოძრაობის აქციას შეუერთდნენ.

_ რატომ გგონიათ, რომ იძულებული არიან?

_ თუ არა იძულება, სხვანაირად ვერ წარმომიდგენია, ქართულად მოაზროვნე ადამიანი როგორ უნდა შეუერთდეს ნაცმოძრაობის აქციას.

_ თუ აფხაზეთის დაცვაა აქციის მიზანი?

_ უკვე გითხარით, რომ ამის არ მჯერა. თუ ამ პარტიებს აფხაზეთის დაცვა უნდათ, დაიცვან არავინ დაუშლის. ნაცმოძრაობის დაძახილზე მისვლა ამ პარტიებისთვის ძალიან ცუდი იქნება. ქართველები განსხვავებული მენტალიტეტის ხალხი ვართ და, როგორც წესი, ყველას დაპატიჟებულზე არ მივდივართ.

_ ადამიანური ურთიერთობა ერთია, პოლიტიკა მეორე...

_ კი მაგრამ არაა ნაცმოძრაობა პოლიტიკური ძალა. ეს არის დამნაშავეთა ბანდა. ბანდა რომ სადღაც გეპატიჟება, იქ მისვლისგან თავი უნდა შეიკავო. ვისაც ამ ბანდის კეთილი მიზნების სჯერა მათ 25 ოქტომბრის სააკაშვილის გამოსვლას გავახსენებ. ის იურისტი კაცია და უჭკუოც არ არის. მისი ყოველი განცხადება კარგად და წინასწარ იყო მოფიქრებული.

_ მისი განცხადება, რომ არჩევნებამდე ვერ დავიცდით, ბევრმა შეაფასა, როგორც მოწოდება გადატრიალებისაკენ. თქვენ რას ფიქრობთ?

_ ის ცდილობს დაამკვიდროს აზრი, რომ თითქოს ქვეყანაში მყარდება დიქტატურა და მძვინვარებს ტერორი. და თუ ასე გაგრძელდა მოსახლეობას აჯანყების უფლება აქვს. აი, ამ მიზანს ემსახურება მისი გამოსვლები. ან რა ტექსტებით საუბრობდა ყოფილი პრეზიდენტი? საქართველოს დედა აღარ ყავს; ქვეყანა გააბანძეს; მინის კოლბაში ჩამჯდარი ქურდული მენტალობის არსება და მსგავსი რაღაცეები. ის ყველა ზღვარს გადავიდა და მის საუბარში კორექტულობის ნატამალი არ შეინიშნება. ეს იყო კარგად დადგმული პიარ-აქცია და მას ნურავინ ნუ უწოდებს ინტერვიუს. კითხვებიც და პასუხებიც წინასწარ იყო დაწერილი.

_ რა გაძლევთ ამის თქმის საბაბს?

_ ის, რაც ვნახე. როდესაც წამყვანი უსვამდა კითხვას, სააკაშვილი ეძებდა ფურცლებს. სხვადასხვა გვერდებზე ეწერა პასუხები და იქედან პასუხობდა. ვისაც არ სჯერა, გადაახვიონ ეს გადაცემა და ყურადღებით დააკვირდნენ. ეს იყო დაწერილი სცენარი. რაც არ უნდა სცენარები დაწერონ სააკაშვილი ამ ქვეყანას ვეღარ დააბოლებს.

_ თქვენ ზემოთ ის მიზეზები ჩამოთვალეთ, რის გამოც ნაცმოძრაობა ქუჩაში გამოდის. მათი გააქტიურება ”ქართული ოცნების” უმოქმედების ბრალიც ხომ არ არის? ”ოცნება” მთლად კარგად ვერ მუშაობს.

_ უმოქმედოდ ვართ-თქო, ვერ ვიტყვი, მაგრამ მეტი აქტიურობაც შეიძლებოდა. ახლა მე ვისაუბრებ ”ქართულ ოცნებაზე”, ოღონდ მხოლოდ პარტიაზე და კოალიციას არ შევეხები. სამწუხაროდ, პარტიის მექანიზმი სათანადოდ მართლაც ვერ ამუშავდა.

_ რამ შეუშალა ხელი?

_ ამას ჰქონდა როგორც სუბიექტური, ასევე ობიექტური მიზეზები. რაც ეს პარტია შეიქმნა, სულ საარჩევნო რეჟიმში გვიწევდა ყოფნა. ამ ორი წლის მანძილზე სამი არჩევნები ჩატარდა. მოკლედ რომ გითხრათ ფორსმაჟორში ვიყავით. ჯერ კიდევ ერთი წლის წინ ვამბობდი, რომ თუ პარტიული მოძრაობა არ დაიქოქებოდა ძალიან გაგვიჭირდებოდა. ახლა პარტია სრულად ამუშავებული არ არის. ვიღაცები ჩვენი ნიშის დაკავებას ცდილობენ. ხომ გაგიგიათ, წმინდა ადგილი ცარიელი არასდროს არ რჩებაო. ნაციონალებიც ცდილობენ ამ ნიშის დაკავებას, მაგრამ არც ეგ გამოუვათ. მალე ბევრი რამ შეიცვლება.

_ კონკრეტულად რა შეიცვლება?

_ ცოტა ხნის წინ პარტიის აღმასრულებელ მდივნად დაინიშნა ზვიად ჯანყარაშვილი. ჩვენ მასთან შეხვედრა მოვითხოვეთ და რამდენიმე დღის წინ შევხვდით კიდევაც. პირადად მე ამ შეხვედრით ძალიან კმაყოფილი ვარ. დავინახე, რომ ზვიადი არის მოტივირებული ადამიანია. მას ნამდვილად აინტერესებს რა ხდება პარტიაში და რა ხდება რეგიონებში. ამ შეხვედრის დროს გაკეთდა ძალიან მწვავე განცხადებები. ითქვა, რა პრობლემებია რეგიონებსა თუ სხვადასხვა სტრუქტურებში. ზვიადმა ეს ყველაფერი ჩაინიშნა და არცვრთი დეპუტატის გამოსვლას არ გაუღიზიანებია. პირველი ნაბიჯი არის იმედისმომცემი. დარწმუნებული ვარ სხვა ნაბიჯებიც იქნება.

_ ზვიად ჯანყარაშვილზე რადგან ვსაუბრობთ, რა რეაქცია აქვთ პარტიაში იმაზე, რომ ის პრემიერის სიმამრის ნათესავია? ნაცმოძრაობა ამის გამო ძალიან აღელვებულია.

_ მათ ამაზეც დიდი ამბავი ატეხეს. სინამდვილეში სხვა რამით არიან შეშფოთებულები. ჩემთვის  უხერხულობას არ ქმნის, რომ ის პრემიერის ცოლის ნათესავია. არც ის მიკვირს, რომ აღმასრულებელ მდივნად დანიშნა, ამ პოსტზე წესით მხოლოდ სანდო ადამიანი უნდა დაინიშნოს. ზვიადის ნდობა ნამდვილად შეიძლება. ჯანყარაშვილთან შეხვედრის შემდეგ დავრწმუნდი, რომ პარტიაში რაღაც შეიცვლება.

_ რა შეიცვლება?

_ დაიწყება პარტიის გაძლიერება. აქამდე როგორც უკვე გითხარით ფორსმაჟორულ სიტუაციაში ვიყავით. ისე რაღაცის გაკეთება ამ ვითარებაშიც შეიძლებოდა.

_ თუ შეიძლებოდა, რატომ არ გაკეთდა?

_ არიან ადამიანები, რომლებსაც საქმის კეთება და პარტიის გაძლიერება არ სურდათ. ფორსმაჟორში ყოფნა ითვლებოდა მიზეზად. ამის გამო ვერ დადგა პარტია ფეხზე მყარად. პარტიის ფეხზე დასაყენებლად სრული ერთი წელი გვაქვს. 2016 წელს საპარლამენტო არჩევნები ტარდება. ამიტომ ეს წელი მხოლოდ არჩევნებისკენ იქნება მიმართული და საორგანიზაციო საქმეებისთვის ვერავინ მოიცლის. არჩევნებისთვის რომ მოემზადო, პოლიტიკური ძალა უნდა იყო. ამ ერთი წლის მანძილზე ბევრი რამის გაკეთება შეიძლება. განსაკუთრებული ყურადღება რეგიონებს უნდა მივაქციოთ. ამაზე უკვე დიდი ხანია ვსაუბრობ და ამის გამო კოალიციაში ბევრი გავაღიზიანე. არადა ანალიზის ჩატარება აუცილებელია.

_ რისი ანალიზი უნდა ჩატარდეს?

_ რატომ და ვისი მიზეზით დამარცხდა ამა თუ იმ რაიონში ”ქართული ოცნება”. კარგად მესმის, რომ არჩევნების მოგებაში ბიძინა ივანიშვილის ფაქტორმა შეასრულა მნიშვნელოვანი როლი. მე მიჩნდება ელემენტარული კითხვა, ბატონი ბიძინას ფაქტორი იმ რაიონებშიც ხომ იყო, სადაც არჩევნები წავაგეთ. იყო რაღაც ნიუანსები, რომლებმაც არჩევნები წაგვაგებინა. ამ რაიონებში იყო ძალადობა, მაგრამ ძალადობა იმ რაიონებშიც ხომ იყო, სადაც 2012 წელს გავიმარჯვეთ. ჩვენ ყველა რაიონში არსებული ვითარება გამადიდებელი შუშით უნდა შევისწავლოთ. არადა ეს პრობლემები ხელისგულზეა. ის ხალხი, რომლებიც არჩევნებამდე დედას აგინებდა ბიძინა ივანიშვილს, ახლა თანამდებობაზეა. ადამიანები, რომლებმაც ”ქართულ ოცნებას” არჩევნები წააგებინეს, ახლა გამარჯვებულ პოზიციაში არიან. ეს ხალხი საარჩევნო შტაბებში იყო, მაგრამ არაფერი გაუკეთებიათ. მათ ეგონათ, რომ არჩევნებს ნაცმოძრაობა მოიგებდა. მერე, როგორც იტყვიან, ომი ყველაფერს ჩამოწერს. მერე ადვილად იტყოდნენ, არჩევნები წაგვაგებინესო. აღმოჩნდა ისე, რომ ქართველმა ხალხმა სხვა არჩევანი გააკეთა. ახალი საქმის წამოწყება სუფთა ნიადაგზე ჯობია. ნიადაგი სუფთა ვერ იქნება, თუ მას ნარჩენებისგან არ გაათავისუფლო. ვინმეს მოსწონს თუ არა, ნიადაგი უნდა გასუფთავდეს. ამის შესახებ ჯანყარაშვილთან შეხვედრაზეც ვთქვი.

_ რა გითხრათ აღმასრულებელმა მდივანმა?

_ ზვიადიც დამეთანხმა რომ ნიადაგი უნდა გასუფთავდეს. ასე თუ არ მოვიქეცით, შედეგს ვერ მივიღებთ. სარეველა თუ იქნა, რაც არ უნდა კარგი მარცვალი ჩააგდო ნაყოფს ვერ მიიღებ. ასეა პოლიტიკაშიც.

_ შეიძლება იმის თქმა, რომ ”ქართულ ოცნებაში” წმენდა დაიწყება?

_ წმენდა არა, უფრო გასუფთავებას დავარქმევდი. ყველა ადამიანს უნდა მივაგოთ დამსახურებისამებრ. ხალხი, რომელიც არჩევნების წინ ”ოცნების” მხარდამჭერებს ატერორებდა, თანამდებობებზე არ უნდა იყოს. ეს ხალხის სამართლიან აღშფოთებას იწვევს.

შორენა მარსაგიშვილი, გაზეთი ”ახალი თაობა” 

Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521352
1521552 online