asdas
ცნობილი ადამიანები
მარინა კახიანი: "რეპეტიციებზე ჯოხით დავდივარ"
პირადი
მარინა კახიანი: "რეპეტიციებზე ჯოხით დავდივარ"

2014-08-21 11:09:01



მაშინ, როცა მისი კოლეგების დიდი ნაწილი დასასვენებლადაა წასული, მსახიობი მარინა კახიანი ზაფხულის ცხელ დღეებს აქტიურ მუშაობაში ატარებს. მიუხედავად იმისა, რომ რუსთაველის თეატრში სეზონი დასრულდა, ქალბატონი მარინა 10 აგვისტომდე რეპეტიციებზე დადის და არ თვლის, რომ ამის გამო საწუწუნო აქვს, პირიქით, ამბობს, რომ ნამდვილი მსახიობებისთვის დატვირთული რეჟიმი აუცილებელიცაა. თეატრისადმი ასეთი ერთგულება მით უფრო დასაფასებელია მისი მხრიდან, თუ გავითვალისწინებთ, რომ ცოტა ხნის წინ სწორედ სცენაზე მიიღო ფეხის სერიოზული ტრავმა.
– ქალბატონო მარინა, როგორც ვიცი, ისევ რეპეტიციები გაქვთ, ისევ აქტიურად მუშაობთ. ასეთ სიცხეში არ გიჭირთ?
– ასე გაგრძელდება 10 აგვისტომდე. მიუხედავად იმისა, რომ რუსთაველის თეატრში სეზონი დაიხურა და მსახიობების ნაწილი შვებულებაში გავიდა, მე რეპეტიციებზე ვარ. ზაფხულს ვატარებ ისე, როგორც ყველა მსახიობი ინატრებდა.
პროფესიული პაუზა მართლაც იშვიათად მქონია. შედარებით ნაკლებად დაკავებული ვიყავი წინა სეზონზე, რადგან ახალი სპექტაკლების რეპეტიციები არ გვქონდა. მსახიობმა როგორც უნდა იწუწუნოს, რომ დაიღალა, ყველაზე ბედნიერი მაშინ არის, როცა თავისი პროფესიით ცხოვრობს.
– შევამჩნიე, რომ სიარული ცოტათი გიჭირთ. რა შეგემთხვათ?
– ერთი თვის წინ რეპეტიციაზე სცენაზე დავვარდი. მაშინ თითქოს არაფერი მეტკინა, მაგრამ თურმე კუნთზე ბოჭკოები დამზიანებია, რამდენიმე დღის შემდეგ კი ეს ბოჭკოები დამიწყდა... ოთხი დღე ვიწექი და ახლა რეპეტიციებზე ჯოხით დავდივარ. სხვათა შორის, ასეთი შემთხვევა ბევრი მქონია. ერთი–ორჯერ დეკორაცია ჩამოვარდა სცენაზე და გადავრჩი, ამ სიტყვის პირდაპირი მნიშვნელობით.
– ქალბატონო მარინა, რა დასამალია, ქართველ მსახიობებს შორის გარეგნობით ერთ–ერთი გამორჩეული ქალი ხართ, პროფესიულად რეალიზებული. შურისა და ჭორების ობიექტად თავი გიგრძვნიათ?
– ვერ ვიტყვი, რომ საკუთარ თავზე უსიამოვნო ჭორები არ გამიგია. უმეტესად ძალიან აბსურდული ჭორები გორდებოდა, რომლებიც აბსოლუტურად ვიღაცის ფანტაზიის ნაყოფს წარმოადგენდა. თავიდან ცოტა ვიშაყირე კიდეც, მაგრამ ისეთ ჭორებს მივრცელებდნენ, მერე ნერვები მომეშალა, რადგან მსგავსი არაფერი ხდებოდა. ახლა ცოტა მიწყნარდნენ. ეტყობა, აღარ ვარ საინტერესო.
სკანდალებში ნამდვილად არ ვყოფილვარ გარეული. ზოგს მოსწონს ეს, სპეციალურადაც დგამს ისეთ ნაბიჯებს, რომ სკანდალური გახდეს. მე კი არ მომწონს. ვცდილობ, ისეთი არაფერი გავაკეთო, რაც სკანდალური გახდება.
– როგორ შეაფასებთ საკუთარ თავს პროფესიაში და მის მიღმა, ძლიერი ქალი ხართ?
– მიუხედავად იმისა, რომ ცხოვრებამ საკუთარ თავში ძლიერი მხარეები აღმომაჩენინა, მაინც მიმაჩნია, რომ სუსტი ვარ. იმ ბრძოლაში, რასაც ცხოვრე ბა ჰქვია, ვიღაც უფრო იჩენს თავს, ვიღაც – ნაკლებად. ვიტყოდი, რომ ძლიერიც ვარ და სუსტიც. ხანდახან შეიძლება რაღაც საკითხში უფრო ძლიერი უნდა ვიყო, მაგრამ რატომღაც მირჩევნია, ჩრდილში დავრჩე ან სუსტი ვიყო. შეიძლება ამ პოზიციამ მოგება არ მომიტანოს და წავაგო, მაგრამ არის რაღაცები, რისი გაკეთება არც მინდა და არც შემიძლია. არ მიმაჩნია სწორად, ადამიანი ყველაფერზე წავიდეს.
– მთავარი სისუსტე ალბათ თქვენი ვაჟია – ვათა.
– შვილი ყველა დედისთვის და განსაკუთრებით ქართველი დედისთვის დიდი სისუსტეა. ამ სიყვარულმა შეიძლება ხანდახან რაღაცაზე უარი გათქმევინოს, რაღაცაზე ფარ–ხმალი თვითონ დაყარო.
– რაზე გითქვამთ უარი შვილის გამო?
– შეიძლება პირად ცხოვრებაზე. ხანდახან საქმეზეც, როლზე...
– როგორი დედა ხართ?
– ნამდვილად მეგობრული დედა ვარ. მით უმეტეს, ჩემი შვილი იმხელაა, რომ უკვე ახლო მეგობარია. საჭირო დროს მკაცრიც ვიყავი, როგორც ყველა დედა.
– ხშირად გვიჭირს ლამაზი და წარმატებული ქალების წარმოდგენა სამზარეულოში, წინსაფრით, თუნდათ ცოცხით ან მტვერსასრუტით. თქვენს დიასახლისობაზე რას გვეტყვით?
– ვერ ვიტყვი, რომ სახლის საქმეებზე ვგიჟდები, მაგრამ კერძის მომზადება ხელოვნებაა. სანამ გავთხოვდებოდი, ნამდვილად არაფრის კეთება ვიცოდი, რადგან ოჯახში იყვნენ დედა, ბებია, მეორე ბებია და არავინ მაიძულებდა, რამე გამეკეთებინა. გათხოვების შემდეგ თვითონ გამიჩნდა კერძების მომზადების სურვილი, რა თქმა უნდა, როცა ამის დრო მქონდა, რადგან დილიდან ღამემდე რეპეტიციები ყოველდღიურად სამზარეულოში ყოფნას გამორიცხავს.
ამბობენ, რომ ძალიან კარგი მზარეული ვარ. ქალმა კერძების მომზადება უნდა იცოდეს. ეს მისთვის კიდევ ერთი პლუსია.
– გაქვთ რიამე ჰობი, გატაცება, რომლის შესახებაც მხოლოდ ახლო წრემ იცის?
– საიდუმლოს გაგიმხელთ და მიყვარს ბანქოს თამაში. ოღონდ მხოლოდ სახლში და არა – კაზინოში. ხან ვიგებ, ხან ვაგებ, ხანდახან ვჩხუბობ კიდეც, მით უმეტეს, თუ შვილიც თამაშობს ჩემთან ერთად. ამ დროს ხელჩართულ ბრძოლაშიც გადავსულვართ.

– 10 აგვისტოდან, როცა რეპეტიციებს მორჩებით, სად გაატარებთ შვებულებას?

– მეგობრებთან ერთად თურქეთში წავალ. ბოლო წლები იქ დასვენება მოგვწონს, ძალიან კარგი ადგილები და მომსახურება აქვთ. 10 დღით განტვირთვა დიდხანს მყოფნის ხოლმე, სულიერად თუ ფიზიკურად ვისვენებ.
– ყველაზე სასიამოვნოდ, გამორჩეულად რომელი დასვენება გახსენდებათ?
– საბედნიეროდ, ასეთი ბევრია. რა თქმა უნდა, განსაკუთრებულად მახსენდება დასვენება ჩემს ქმართან ერთად...
ერთ ისტორიას გავიხსენებ, როცა მეუღლესთან ერთად ვიყავი შატილში. არ ვისვენებდით, ვმუშაობდით, მაგრამ ეს ყველაზე კაშკაშა მოგონებად დარჩა ჩემთვის. ჩემი მეუღლე, რეჟისორი გია მატარაძე, იღებდა ფილმს "მოკვეთილი", სადაც პატარა როლს ვთამაშობდი. ამისთვის ორი დღე შატილში მოგვიწია ყოფნა.
გადაღების პროცესი ძალიან საინტერესო იყო: ლამაზ გარემოში ვიყავით მეგობრებთან, დედაჩემთან, შვილთან ერთად. იქ მოუწია ჩემს მეუღლეს დაბადების დღემ. დილით ხმაურმა გაგვაღვიძა. გადამღებ ჯგუფში ცხენოსნებიც იყვნენ, მათ ხევსურული ფორმები ჩაეცვათ და ცხენებზე ამხედრებულები, თოფებით ხელში, გიას დაბადების დღეს ულოცავდნენ. ეს ყველაფერი ნისლში ხდებოდა. წარმოუდგენელი სილამაზე იყო და არასოდეს დამავიწყდება!
მანანა ნოდია, ჟურნალი სარკე


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1522616
1522816 online