asdas
ცნობილი ადამიანები
ვზრდით მომავალ ხელმძღვანელს
რჩევები
ვზრდით მომავალ ხელმძღვანელს

2014-11-20 02:18:42



ყველა მშობელს სურს, მისი შვილი ძლიერი და წარმატებული იყოს, მაგრამ ამას როგორ მიაღწიონ, რისი გაკეთებაა ამისთვის საჭირო და რა მეთოდებით აღზარდონ, ეს ყველამ ნამდვილად არ იცის.
ორგანიზატორი თუ კრიტიკოსი? – ორი ერთნაირი ხელ–მძღვანელი არ არსებობს. ფსიქოლოგები ლიდერების რამდენიმე ტიპს გამოყოფენ:
ემოციური, რომელსაც აქვს უნარი, დადებითი განწყობა შექმნას და სხვების თვალში სანდომიანი ადამიანი იყოს. კრიტიკოსი, რომელსაც შეუძლია, რეალურად შეაფასოს სიტუაცია და მოახდინოს მისი ანალიზი, ერთმანეთისგან გამიჯნოს დადებითი და უარყოფითი მხარეები. ინტელექტუალი, რომელიც იდეების გენერატორია და პოზიტიურად მოქმედებს სხვებზე. ორგანიზატორი არაჩვეულებრივად გეგმავს ყველა საქმეს, ითვალისწინებს ნიუანსებს. ის იმითაც გამოირჩევა, რომ სწორად შეუძლია დავალებებისა და საქმის გადანაწილება. შემსრულებელი ის ლიდერია, რომელსაც უნიკალური უნარი აქვს, დათქმულ ვადაში შეასრულოს დაკირსებული საქმე.
თუ პატარას ყველა თვისება გააჩნია, რომ მომავალში ხელმძღვანელად ჩამოყალიბდეს, ამ შემთხვევაში მშობლებს ისღა მოეთხოვებათ, ყველანაირად შეუწყონ ხელი მის რეალიზებას.
1. პატივი ეცით ბავშვს – ეს მნიშნელოვანია, განსაკუთრებით, როცა საუბარია ლიდერის თვისებების მქონე პატარებზე. მოგეხსენებათ, საკუთარი თავის რწმენა დიდადაა დამოკიდებული, რამდენად პატივისცემით ვეკიდებით მშობლები შვილის გადაწყვეტილებებს, შეხედულებებს, ამიტომ ბავშვი მუდმივად დარწმუნებული უნდა იყოს, რომ მშობლებს მისი სჯერათ. ეს ძლიერი საფუძველის ჩაყრის ტოლფასია, რაც მომავალში შედეგს გამოიღებს და ბავშვის წარმატებულ ხელმძღვანელად ჩამოყალიბებას შეუწყობს ხელს.
2. არ არის საჭირო შვილის ზედმეტად დაცვა – რა თქმა უნდა, ზომიერების ფარგლებში ყველაფერი საჭიროა, მაგრამ ამ შემთხვევაში ოქროს შუალედის მოძებნა გვმართებს, რადგან გადამეტებამ შესაძლოა უკუეფექტი გამოიწვიოს.
3. მიეცით ბავშვს უფლება, იოცნებოს და ამბიციები გამოავლინოს – ოცნების ასრულებისკენ სწრაფვა თვითგანვითარების ერთ–ერთი ძლიერი სტიმულია. საჭიროა ბავშვს სჯეროდეს, რომ მისი ოცნება რეალურია ანუ შესრულებადი და ადრე თუ გვიან შეძლებს მის განხორციელებას.
4. შვილისთვის სპორტის სახეობის შერჩევისას უპირატესობა გუნდურ სახეობებს მიანიჭეთ – კალათბურთი და ფეხბურთი ბუნებით ლიდერ პატარებს ეხმარება, გუნდთან ურთიერთობა და სწორი კომუნიკაცია ისწავლონ.
5. იზრუნეთ შვილის თვალსაწიერის გაფართოებაზე – რაც უფრო განათლებულია ბავშვი, მით უკეთესი. განსაკუთრებით მნიშვნელოვანია ზოგადი განათლება, რადგან მისი დახმარებით პატარა თავს ბევრად თავდაჯერებულად გრძნობს.
6. განუვითარეთ ორატორის ნიჭი – ხელმძღვანელისთვის ძალიან მნიშვნელოვანია, არ ეშინოდეს ფართო აუდიტორიის წინაშე გამოსვლის. შვილი პატარაობიდანვე მიაჩვიეთ ლექსების თქმას, ზღაპრების მოყოლას. შთაბეჭდილებების გაზიარება და კამათი მისთვის ჩვეულებრივი მოვლენა უნდა იყოს და არა – რაღაც განსაკუთრებული.
აუცილებელია, ბავშვი მუდმივად შეაქოთ. მაგალითად, თუ გამოთქმით წაიკითხავს ლექსს და არავითარ შემთხვევაში გაკიცხოთ არასწორად წარმოთქმული სიტყვებისა და ფრაზების გამო. ამ შემთხვევაში უპრიანია, თუ რამდენჯერმე გაუმეორებთ და სწორად წარმოთქმაში დაეხმარებით.
7. ასწავლეთ ურთიერთობა – ერთი შეხედვით, ეს ვითომ არ არის რთული, მაგრამ რეალურად არც ისე მარტივადაა საქმე. პატარას უნდა შეეძლოს, თანატოლებთან ადვილად დაამყაროს ურთიერთობები, არ იჩხუბოს, იყოს დამთმობი, საჭიროების შემთხვევაში კი საკუთარი პრინციპები დაიცვას. როცა თანატოლებთან თამაშის დროს რაღაც ისე ვერ აეწყობა, გასაგებ ენაზე აუხსენით, რატომ არ უნდა მოქცეულიყო ასე და რისი გაკეთება იქნებოდა უკეთესი.
8. საკუთარ მაგალითზე – პატარები ხშირად ახდენენ მშობლების საქციელის კოპირებას, ამიტომ სწავლების ყველაზე კარგი მეთოდი მშობლების მაგალითია. კარგად დაუკვირდით და დაუფიქრდით თქვენს ქმედებებს. გააანალიზეთ, რა შემთხვევაში როგორ უნდა მოიქცეთ და ეცადეთ, არგუმენტებით დაუსაბუთოთ შვილს თქვენი საქციელის სისწორე.
ერთ–ერთი ცნობილი ორგანიზაციის მკვლევრებმა, რომლებიც ლიდერ ბავშვებში ატარებდნენ კვლევებს, დაასახელეს მშობლების რამდენიმე ქმედება, რაც ბავშვის ხელმძღვანელად ჩამოყალიბების პროცესში ხელისშემშლელია და ლიდერობის ხარისხს მნიშვნელოვნად თრგუნავს.
1. ხშირად შვილებს ვართმევთ უფლებას, თავად შეიგრძნონ რისკი, გარკვეული დოზით მაინც. მშობლების შვილებისადმი ამგვარი დამოკიდებულება გასაკვირი არაა და თავისი ახსნაც აქვს. რეალურად დღეს ისედაც სახიფათო გარემოში გვიწევს ცხოვრება, მშობლები მუდმივად შიშობენ და ნერვიულობენ შვილების გამო, ამიტომ ცდილობენ, ეს ყველაფერი ბავშვებზე ტოტალური ზრუნვით გადაფარონ. როგორც ფსიქოლოგებმა აღმოაჩინეს, პატარები, რომლებიც არ თამაშობენ ეზოში, არ წაქცეულან, არ მიუღიათ მცირე ტრავმა და ა.შ., ფობიებით არიან შეპყრობილები.
საჭიროა რამდენჯერმე დაეცეს, იტკინოს კიდეც იმისთვის, რომ მიხვდეს, რა არ გაკეთოს. სხვაგვარად რისკის პლუს–მინუსებს ვერ ისწავლის. გარდა ამისა, ასეთი ტიპის პატარებს თვითშეფასების ხარისხიც ნაკლები აქვთ, რაც ცუდია.
2. მშობლები ხშირად ვცდილობთ, შვილებს გარკვეული ვალდებულებები ავარიდოთ. არ ვაძლევთ საშუალებას, დამოუკიდებლად მიიღონ გადაწყვეტილებები. ფაქტია, რომ ბავშვი ნელ–ნელა ეჩვევა იმას, რომ ყოველთვის ვიღაც უშველის, ეს კი დაუშვებელია. ეცადეთ, პატარამ გარკვეული გადაწყვეტილებები თავად მიიღოს, დედიკოსა და მამიკოს დახმარების გარეშე.
3. ადრე თუ გვიან დადგება დრო, როცა შვილი ფრთებს გაშლის და დამოუკიდებლად და თავისუფლად მოისურვებს ცხოვრებას. ბუნებრივია, მშობლებმა ამის უფლება უნდა მივცეთ, მაგრამ ეს იმას არ ნიშნავს, რომ მათ ცხოვრებაში მონაწილეობას აღარ ვიღებთ, სწორი ორიენტირების აღებაში არ ვეხმარებით. შვილებთან ერთად გაიზიარეთ შეცდომებიც და წარმატებებიც, იმსჯელეთ, განიხილეთ ყველა ვარიანტი... სწორი გადაწყვეტილების მიღება მხოლოდ ასე იქნება შესაძლებელი.
უშეცდომო ადამიანი არ არსებობს. ცხოვრებში ჩვენ, მშობლებსაც ბევრი რამ შეგვშლია და შესაძლოა, ახლაც გვეშლება. ეს ნორმალურია, რადგან სხვაგვარად წარმოუდგენელია. ხშირად მოუყევით შვილს, თქვენ რას განიცდიდით, როცა მსგავს სიტუაციაში იყავით.
არ არსებობს სახელმძღვანელო, რომელშიც ამოიკითხავთ, რომ აი, ახლა არის უკვე სათანადო დრო, ბავშვს თავისუფლება მისცეთ. ეს მშობლებმა ინტუიციურად, ბავშვის ასაკის შესაბამისად უნდა განსაზღვრონ. თვალი ადევნეთ სხვა ბავშვებს. თუ ამჩნევთ, რომ თანატოლები თქვენს შვილთან შედარებით უფრო დამოუკიდებლები და თავისუფლები არიან, დაფიქრდით, თავად ხომ არ უქმნით გარკვეული სახის პრობლემებს და პატარას დამოუკიდებელ პიროვნებად ჩამოყალიბების პროცესს აფერხებთ. თუ ეს ასეა, მეტი თავისუფლება მიეცით. თუ ბავშვს ლიდერის ბუნება აქვს, ეს დაეხმარება, დროთა განმავლობაში დამოუკიდებელი, თავდაჯერებული გახდეს და ხელმძღვანელის თვისებები გამოიმუშაოს.
მოამზადა ნათია ტოტიკაშვილმა, ჟურნალი სარკე 


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521760
1521960 online