asdas
ცნობილი ადამიანები
გია ლორთქიფანიძის სიდედრ დალი გომელაურს განათლების სამინისტრო მფარველობს?
ახმეტის საკრებულო პარლამენტის განათლების კომიტეტს მიმართავს
გია ლორთქიფანიძის სიდედრ დალი გომელაურს განათლების სამინისტრო მფარველობს?

2014-10-29 15:54:55



სკოლის დირექტორების თემა ჩვენში არაერთი სკანდალის მიზეზი გამხდარა. ლოტოტრონით განაწილებული დირექტორების ისტორია, როგორც იქნა წარსულს ჩავაბარეთ, მაგრამ ახლა სხვა სახის პრობლემებმა იჩინა თავი. თანამდებობებზე ისეთ დირექტორებს ტოვებენ, რომლებიც წინა ხელისუფლების დროს პოლიტიკური შეხედულებების გამო მასწავლებლებთან ერთად, მოსწავლეებს და მასწავლებლებსაც აწიოკებდნენ.

ასეთი რამეები მთელი ქვეყნის მასშტაბით ხდებოდა. ამ მხრივ გამონაკლისი არც ახმეტის რაიონი ყოფილა. როგორც ამბობენ, განსაკუთრებით პოლიტიზირებული ახმეტის #2 საჯარო სკოლა იყო. ამ სკოლის დირექტორი ვანო მერაბიშვილის ყოფილი მოადგილის, გია ლორთქიფანიძის სიდედრი, დალი გომელაური გახლდათ. ის რომ ნაციონალებს დაუჭერდა მხარს, ამაში ალბათ ეჭვი არავის შეგეპარებოდათ. გასაკვირი ისაა, რომ ის ქალი დღესაც აპირებს ამ თანამდებობაზე დაბრუნებას.

ახმეტაში ჭორაობენ, რომ მას განათლების სამინისტროში სერიოზული ხალხი მფარველობს. არის თუ არა მათ რიგებში განათლების მინისტრი თამარ სანიკიძე, ვერ გეტყვით. როგორც ახმეტელები ამბობენ, დალი გომელაური ამბობს, რომ მას სამინისტროსგან სერიოზული მხარდაჭერა აქვს.

ამ მხარდაჭერაზე ის ამბავიც უნდა მოგითხროთ, რომელმაც ახმეტის საკრებულო პირდაფჩენილი დატოვა.

ცოტა ხნის წინ ახმეტის საკრებულოს რამდენიმე წევრმა განათლების მინისტრის სახელზე უსტარი გააგზავნა. ამ წერილის ავტორები მინისტრს იმ სკანდალებს აცნობენ, რომლებშიც თავის დროზე გია ლორთქიფანიძის სიდედრი გაეხვია. ამ ამბავმა მაშინ მთელი კახეთის მხარე გააოგნა. რამდენიმე წლის წინ ახმეტის #2 საჯარო სკოლამ ოქროს მედალი 20 ბავშვს მიანიჭა. ამ ქალაქში კარგი სწავლით ვერავის გააკვირვებ, მაგრამ ერთ კლასში ამდენი მედალოსანი ცოტა გასაკვირი იყო. საინტერესო იყო ისიც, რომ მედალოსანთა მშობლები თუ ახლო ნათესავები მამალი ნაციონალები იყვნენ. წარჩინებული კლასის ჟურნალი სადღაც გაქრა და მის კვალს დღემდე ვერავინ მიაგნო.

საკრებულოს წევრების მიერ განათლების სამინისტროში გაგზავნილ წერილში ნათქვამია:

_ ქალბატონო თამარ, გვსურს ჩვენს რაიონში შექმნილი უხერხული მდგომარეობის შესახებ გაცნობოთ, რომელიც შეეხება თქვენი უწყების დაქვემდებარებაში მყოფ ახმეტის #2 საჯარო სკოლას, კერძოდ სკოლის დირექტორის მოვალეობის შემსრულებელს, ქალბატონ დალი გომელაურს. ცნობისათვის, ეს ქალი გახლავთ ყოფილი შინაგან საქმეთა მინისტრის ვანო მერაბიშვილის ყოფილი მოადგილის, ახმეტელი გია ლორთქიფანიძის სიდედრი. წინა ხელისუფლების მმართველობის წლებში, დიდი გავლენითა და მოწადინებით განაგებდა ახმეტაში განათლების სფეროს პოლიტიზირების საკითხებში. ახმეტის #2 საჯარო სკოლა იყო ავანგარდი და საპილოტე სკოლა, ყოფილი მმართველი პარტიის ძლევამოსილების გაძლიერების საქმეში. დირექტორი კანონმდებლობის უხეში დარღვევით და ამასთან სხვა სკოლებისთვის მაგალითის მისაცემად, დაუნდობლად წყვეტდა მისთვის და შესაბამისად პოლიტიკურად არასასურველი პიროვნებების ბედს. ეს ხალხი დღემდე უმუშევარია და ვერ იგებენ, რატომ ხდება, რომ 70 წელს მიღწეული დალი გომელაური დღესაც ცდილობს, ზემოაღნიშნულ სკოლაში ხელმძღვანელ თანამდებობაზე დაინიშნოს. რაც ზოგადი განათლების შესახებ საქართველოს კანონის 41-ე მუხლის ბ ქვეპუნქტის უხეშ დარღვევად შეიძლება ჩაითვალოს. უფრო მეტიც, დაინტერესებულ კატეგორიას (სამეურვეო საბჭო) არწმუნებს, რომ სამინისტროში ყველაფერი გადაწყვეტილია და დირექტორად მე ვინიშნებიო. 2010 წელს ახმეტის #2 საჯარო სკოლაში 20-მდე ოქროს მედალი გაიცა. ეს ”ჯილდოები” ძირითადად წინა ხელისუფლების მოწინავე აქტივისტების შვილებს ხვდათ წილად. მოსწავლეების წლიური შედეგების გასაყალბებლად და დირექტორის მიერ ჩადენილი დანაშაულის დაფარვის მიზნით საკლასო ჟურნალი ”დაიკარგა”. ამ საქმეზე ახმეტის პოლიციის სამმართველოში საქმეც კი აღიძრა, მაგრამ მაშინვე ამბობდნენ, რომ ამ საქმის გამოუძიებლობა შეთანხმებული იყო შს მინისტრის მაშინდელ მოადგილესთან. ეს იყო მაშინდელი განათლების სისტემის მიერ ნაჩვენები საჯარო მაგალითი მმართველი პოლიტიკური ჯგუფისთვის თავდადებული ხალხის მხარდასაჭერად და ადგილზე განათლების სისტემაში ”თანამშრომელთა ქცევის ახალი ნორმების” დასამაკვიდრებლად. ამომრჩეველთა მიერ ეს საკითხი არაერთხელ დაისვა ახმეტის მუნიციპალიტეტის საკრებილოს წინაშე. ამიტომაც გადავწყვიტეთ ჩაგვეყენებინეთ საქმის კურსში.

წერილმა ადრესატამდე მალევე მიაღწია და არც იქედან დაუგვიანია პასუხს. ამ პასუხმა ახმეტის საკრებულოს წევრები გაოგნებული დატოვა.

სამინისტროდან გამოგზავნილ წერილს ხელს შიდა აუდიტის დეპარტამენტის უფროსი ალექსანდრე ონოფრიშვილი აწერს. წერილიდან აშკარაა, რომ 20 მედალოსნის და გამქრალი ჟურნალის, ასევე აწიოკებული მასწავლებლების ამბავი სანიკიძის უწყებას არ აინტერესებს.

ამ საკითხთან დაკავშირებით ჩვენ კომენტარი ვთხოვეთ ახმეტის საკრებულოს თავმჯდომარის მოადგილე ზაქარია ქინქლაძეს.

საკრებულოს სხვა წევრების მსგავსად, სამინისტროს პასუხით ისიც გაკვირვებულია.

ზაქარია ქინქლაძე: _ გიდასტურებთ, რომ ჩვენ მართლაც გავაგზავნეთ განათლების სამინისტროში წერილი. სადაც ვსაუბრობდით იმ პრობლემებზე, რომლებიც ქალბატონ დალი გომელაურთან არის დაკავშირებული. ამ საკითხზე ახმეტაში ყველამ ყველაფერი იცის. ამომრჩევლები ხშირად გვეუბნებიან, რატომ არის ეს ქალი ისევ თანამდებობაზე. საქმის გასარკვევად სამინისტროს მივმართეთ. სადაც, როგორც დალი გომელაური ამბობს, ყველაფერი მოგვარებულია. სამინისტროდან მიღებულმა წერილმა ყველა გააკვირვა. წერილის ავტორი გვწერს, რომ საკლასო ჟურნალის დაკარგვის ფაქტზე თურმე მოკვლევა ჩატარდა და პედაგოგებს დისციპლინარული სასჯელი დაეკისრათ.

საკრებულოს წევრები ამ საქმის ასე დატოვებას არ აპირებენ. ისინი ახლო მომავალში საკანონმდებლო ორგანოს გაუგზავნიან მიმართვას.

_ ახმეტის #2 საჯარო სკოლაში დატრიალებულ ამბებზე ჩვენ გვთხოვენ პასუხს. უკვირთ, დღემდე რატომ არის ეს ქალი სკოლის დირექტორი. ის შს მინისტრის ყოფილი მოადგილის, გია ლორთქიფანიძის, სიდედრია. ის სამაგალითოდ სჯიდა განსხვავებული შეხედულებების მქონე ადამიანებს. ეს ეტყობა განათლების სამინისტროში არ აინტერესებთ. ამ საკითხის გასარკვევად უახლოეს დღეებში პარლამენტს, კონკრეტულად კი განათლების კომიტეტის თავმჯდომარეს ვანო კიღურაძეს მივმართავთ, _ განაცხადა ქინქლაძემ.

შორენა მარსაგიშვილი, გაზეთი ”ახალი თაობა”

Content on this page requires a newer version of Adobe Flash Player.

Get Adobe Flash player

კავშირი ტეგთან: კლას ინგესონი
დღის სიახლეები
რა მოსწონთ თქვენ მეგობრებს

Alternative content

1521552
1521752 online