asdas
ცნობილი ადამიანები
ბურაკ ოზჩივიტი: "ქალები მოსვენებას არ მაძლევენ!"
"მალკოჩოღლუ ბალი ბეიმ თურქეთში ულვაში მოდური გახადა"
ბურაკ ოზჩივიტი: "ქალები მოსვენებას არ მაძლევენ!"

2014-07-23 00:42:45



თურქული საპნის ოპერების ერთ–ერთმა გამორჩეულმა გმირმა, ბურაკ ოზჩივიტმა კარიერა სამოდელო ბიზნესით დაიწყო. 2003 წელს მონაწილეობა მიიღო კონკურსში "თურქეთის საუკეთესო მოდელი" და წლის აღმოჩენა გახდა. 2 წლის განმავლობაში ის ცნობილ სამოდელო სააგენტოში მუშაობდა. 2005 წელს კვლავ სცადა ბედი ამავე კონკურსში და ამჯერად მეორე ადგილს დასჯერდა. მომდევნო წლებში ბურაკი პოპულარული ევროპული ბრენდების სახე გახლდათ თურქეთში. მოგვიანებით ძალები კინოშიც მოსინჯა და საკმაოდ წარმატებითაც.
ახალგაზრდა მსახიობის (ბურაკი სტამბულში 1984 წლის 24 დეკემბერს დაიბადა) კინოდებიუტი 2006 წელს შედგა სერიალში "მინუს 18". 2007 წელს მონაწილეობა მიიღო სრულმეტრაჟიან მძაფრსიუჟეტიან თრილერში "შეშინებული". ეს ოზჩივიტის პირველი სერიოზული ნამუშევარი გახდა, რასაც მოჰყვა სერიალი "ქმარი იძულებით". 2011 წელს ბურაკი უკვე სერიალ "დიდებული საუკუნის" გადასაღებ მოედანზე იყო. მასში ის ერთ–ერთი მთავარი გმირის, მალკოჩოღლუ ბალი ბეის როლს თამაშობს.
ამ როლმა ახალგაზრდა მსახიობს საოცარი პოპულარობა მოუტანა და უნებურად თურქ ახალგაზრდებში ულვაშის ტარების მოდის დამფუძნებლად იქცა. თურქეთში ულვაშს უკვე ისეთი მამაკაცებიც ატარებენ, რომლებიც მანამდე დარწმუნებულები იყვნენ, რომ ეს სტილი არ უხდებოდათ. ბურაკის დამსახურებით ულვაშს თურქეთში ახლა ყველგან ნახავთ: ჭურჭელზე, მაისურებსა და საცვლებზეც კი.
2013 წელს ცნობილი ულვაში ბურაკ ოზჩივიტის რესტორნის სიმბოლოც გახდა. სტამბულის სავაჭრო–გასართობ ცენტრში რესტორანი გაიხსნა სახელწოდებით "ბალი ბეი". ცნობილია, რომ ბურაკმა საკუთარი დიზაინით გააფორმა რესტორანი, ასევე პირადად უძღვებოდა სარემონტო სამუშაოებს. რესტორნის შესასვლელში, რა თქმა უნდა, მომხიბვლელი მსახიობის ფოტოებია გაკრული. მენიუზე, ხელსახოცებზე, თეფშებზე, კედლებსა და მზარეულების წინსაფრებზე კი საფირმო ულვაშია გამოსახული. ამ რესტორანს უკვე საკმაოდ ბევრი მომხმარებელი ჰყავს.
ახლახან ოზჩივიტს შესთავაზეს, მონაწილეობა მიიღოს 13 სერიიან ფილმში, რომელსაც გაერთიანებულ არაბთა საემიროში გადაიღებენ. ამ სერიალში მას 1 მილიონ ამერიკულ დოლარს გადაუხდიან.
სერიალ "დიდებულ საუკუნეში" ერთგული და თავდადებული მებრძოლი ასეთივე ერთგული შეყვარებულიცაა. ამჟამად ბურაკი მეგობარ ქალ ჯეილაინ ჩაპასთან ცხოვრობს. წყვილი ერთად ძალიან ბედნიერია და დაქორწინებასაც გეგმავენ.
2014 წლის მაისში ოზჩივიტი ხორვატიას ესტუმრა, სადაც მას ჟურნალ "სფაუ 24"–ის კორესპონდენტი გაესაუბრა.

– ბურაკ, თქვენ, როგორც მოდელი, ძალიან წარმატებული იყავით, შემდეგ კი სერიალ "დიდებულ საუკუნეში" შესრულებული მალკოჩოღლუ ბალი ბეის როლით ცნობილი მსახიობიც გახდით. პოპულარობისკენ ყოველთვის ისწრაფვოდით?

– ცხოვრებაში მხოლოდ ერთი მიზანი მქონდა და მაქვს – ჩემი საქმე ბოლომდე და ხარისხიანად გავაკეთო. პოპულარობა, მაყურებლის სიყვარული, წარმატება კარგი და სასიამოვნოა, მაგრამ ცხოვრებას, როგორც მედალს, ორი მხარე აქვს. პოპულარობა ყოველთვის ადვილი არ არის, პოპულარობით პრობლემებს ვერ გადაჭრი, პირიქით, ეს ხშირ შემთხვევაში ტვირთია და კიდევ, ძალიან ცუდად მოქმედებს ფსიქიკაზე. მე ვცდილობ, თვითრიტიკული ვიყო. სხვათა შორის, ჩემი კარიერა მამის დამსახურებაა, მან ჩემი ფოტოსურათი თურქეთის სამოდელო კონკურზე გააგზავნა, რადგან მისი ოცნება იყო, მოდელი გავმხდარიყავი. მე მოდელობაზე არ ვფიქრობდი, რადგან პატარა ვიყავი. დღემდე მიზიდავს მოდელის პროფესია, მაგრამ ამისათვის დრო აღარ მრჩება.
– "დიდებულ საუკუნეში" განსახიერებული თქვენი როლის შემდეგ ულვაში თურქეთის მასშტაბით ძალიან პოპულარული გახდა. თქვენ ულვაში ხელს არ გიშლით?
– დიახ, მალკოჩოღლუ ბალი ბეიმ თურქეთში ოსმალური ულვაში მოდური გახადა. მე ულვაშს უკვე 4 წელია ვატარებ და ხელს სულაც არ მიშლის. ვფიქრობ, მიხდება და ამავდროულად ეს ჩემი რეკვიზიტია. მამასთან ერთად რესტორანი გავხსენი, რომლის თითოეულ ნივთზე ჩემი ულვაშია გამოსახული.
– თქვენი ბოლო ნამუშევარია სერიალი "ნარჩიტა მგალობელი ფრინველია". გაგიჭირდათ ამ როლის შესრულება?
– ეს როლი ჩემთვის საინტერესო და ამავდროულად გამომწვევიც იყო. რომანი "ნარჩიტა მგალობელი ფრინველია" ჯერ კიდევ დაწყებით კლასებში წავიკითხე და არაერთხელ ვუყურე 1986 წელს გამოშვებულ სერიალს აიდან შენერისა და კენან კალავის მონაწილეობით. როდესაც მთავარ როლზე დამამტკიცეს, საკუთარ თავს ვკითხე, კენანის შემდეგ თუ შევძლებდი ამ როლის შესრულებას. სერიალის გადასაღებად თითქმის ნახევარი წელი ვემზადებოდით და ვცდილობდი, ბოლომდე გამეთავისებინა კიამრანის როლი.
– როგორ ფიქრობთ, შესაძლებელია, ასეთი სიყვარული რეალურ ცხოვრებაშიც განმეორდეს?
– ასი წლის წინ ეს ჩვეულებრივი მოვლენა იყო. მაშინ ადამიანებს გულის გადასაყოლებელი საშუალებები თითქმის არ ჰქონდათ და მარტოობით იტანჯებოდნენ. ჩვენ უკვე მაღალი ტექნოლოგიების ეპოქაში ვცხოვრობთ და ადამიანს ინტერნეტი ანაცვლებს. საერთოდ კი ვფიქრობ, რომ ასეთი სიყვარული მარტო ფილმებში არაა, რეალურ ცხოვრებაშიც არსებობს.

– როგორი იყო თქვენს მეწყვილესთან, ფახრიე ევჯენთან მუშაობა?

– ჩვენ არც ისე დიდი ხნის წინ გავიცანით ერთმანეთი, თუმცა, როგორც მსახიობს, დიდი ხანია პატივს ვცემ, სერიალ "ფოთოლცვენაში" შესრულებული როლით თავი ყველას შეაყვარა. ინტუიციით ვერ დავიკვეხნი, მაგრამ კასტინგზე მაშინვე ვიგრძენი, რომ ის ფერიდეს როლის შემსრულებელი უნდა ყოფილიყო. მასაც ჩემსავით უნდოდა ამ სერიალში მონაწილეობის მიღება.
– როგორ ფიქრობთ, კარგი მსახიობი ხართ?
– სამსახიობო განათლება არ მიმიღია, მაგრამ ვცდილობ, კარგი მსახიობი ვიყო.
– თქვენს საცოლეს, ჯეილან ჩაპას ეჭვიანობის გამო არაერთხელ დაშორდით. ამჯერად სერიალში თქვენს პარტნიორზე ხომ არ ეჭვიანობს?
– ახლა აღარ ეჭვიანობს, რადგან მიხვდა, რომ ეს ჩემი სამსახურია და ბევრი დრო მიაქვს. ხანდახან ვკამათობთ კიდეც, როგორც ყველა ნორმალური წყვილი. დაქორწინებისაგან ჯერჯერობით თავს ვიკავებთ, მაგრამ იმიტომ არა, რომ ერთმანეთს ვერ ვუგებთ, უბრალოდ, დრო არ მაქვს. ბედნიერი ვარ, რომ ჯეილანს ჩემი ესმის. ჩვენ ერთმანეთი ძალიან გვიყვარს.
– წარმოგიდგენიათ, ამ სიტყვებით რამდენ ქალს დასწყვეტთ გულს?
– ქალები მოსვენებას არ მაძლევენ! ცოტა ხნის წინ ფანებმა სტამბულში ჩემი ახალი სახლის მისამართიც გაიგეს და ასამდე ქალმა სახლს ალყა შემოარტყა, სანამ გარეთ არ გავედი.
– რა არის თქვენი ჰობი, თავისუფალ დროს რითი ხართ დაკავებული?
– ძალიან მიყვარს ფეხბურთის თამაში, წიგნების კითხვა, მუსიკის მოსმენა და მანქანის მართვა.
– მანქანები გიყვართ?
– დიახ. კლასიკური მანქანები მიყვარს, რადგან ვფიქრობ, ისინი ცოცხალი არსებები არიან.
მოამზადა თათია ბოჭორიძემ, ჟურნალი სარკე 


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1522856
1523056 online