asdas
ცნობილი ადამიანები
"იმ შეგნებით, რომ წელიწადში ერთხელ ზიარება საკმარისია, ადამიანი თავს იღუპავს"
გვესაუბრება მამა გიორგი სხირტლაძე
"იმ შეგნებით, რომ წელიწადში ერთხელ ზიარება საკმარისია, ადამიანი თავს იღუპავს"

2014-10-30 11:19:26



მორწმუნის ცხოვრებაში განსაკუთრებული ადგილი უჭირავს სულიერი მოძღვრის რჩევა–დარიგებას, რადგან უფლისკენ მიმავალ გზაზე ბევრია დაბრკოლება, ფიზიკური თუ სულიერი, რასთანაც თავად გამკლავება არ ძალუძს. არსებობს კითხვები, რომლებზეც პასუხების გაცემა მხოლოდ სულიერ მამებს შეუძლიათ, რომლებთანაც უწყვეტი კონტაქტი ქრისტიანისთვის აუცილებელია, რომ არ დაიბნეს, ჭეშმარიტების გზა არ დაკარგოს და დედაეკლესიას არ დაშორდეს. იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) სწორედ ამგვარ კითხვებზე გვიპასუხებს.
– მამაო, თუ ადამიანს არ ჰყავს მოძღვარი, მაგრამ ლოცვებსა და დაუჯდომლებს კითხულობს, მიუტევებს თუ არა უფალი ცოდვებს და იქნება თუ არა ბოროტისაგან დაცული?
– რა თქმა უნდა, ლოცვას თავისი ძალა აქვს, მაგრამ არსებობს სინანულის საიდუმლო, რომელიც უძველესი დროიდან, ეკლესიის დაარსების დღიდან მოდის. როდესაც იუდეის უდაბნოში წმნიდა იოანე ნათლისმცემელი ქადაგებდა, მასთან მიდიოდნენ ადამიანები, აღიარებდნენ თავიანთ ცოდვებს და მდინარე იორდანეში ინათლებოდნენ. სულიწმინდის გარდამოსვლის დღიდან პირველი ეკლესია დაფუძნდა და ასევე დაარსდა სინანულის საიდუმლოებაც. ამ საიდუმლოებას აუცილებლად აქვს ხილული მხარე, როცა მორწმუნე მოძღვართან აღიარებს თავის ცოდვებს და ლოცვის წაკითხვის შემდეგ მოძღვარი შეუნდობს მას. მღვდელმსახურის მიერ წაკითხულ შენდობის ლოცვას უდიდესი მნიშვნელობა აქვს, ვინაიდან წმინდა წერილი გვამცნობს, რომ მოძღვრები არიან ადამიანები, რომლებსაც მიეცათ ძალაუფლება უფლის სახელით ცოდვების მიტევებისა – ვისაც მიუტევებენ, მიტევებული იქნება, ხოლო ვისაც შეკრავენ, შეკრული იქნება ცათა შინა.
აუცილებელია, ყველა ქრისტიანს ჰყავდეს მოძღვარი. სულიერი მოძღვრის შერჩევა პიროვნული აქტია, ანუ ადამიანმა თავად უნდა განსაზღვროს, ვინ იქნება მისი მოძღვარი, ვის გამოუცხადებს ნდობას, ვისგან მიიღებს რჩევა–დარიგებას და მხოლოდ ამის შემდეგ დაიწყებს იგი სულიერ მოღვაწეობას, ვინაიდან ყველას სჭირდება გზის გამკვლევი, მასწავლებელი. კარგია, თუ ადამიანი ლოცულობს, მაგრამ ეს საკმარისი არ არის. მან უნდა ამოირჩიოს მოძღვარი და იაროს ეკლესიაში.
– რატომ ამბობენ, რომ საიქიოში ყველა 33 წლის იქნება?
– ითვლება, რომ ჯანმრთელობისა და ცხოვრების ნორმალური პირობების შემთხვევაში ადამიანის ხორციელი ბუნება ოპტიმალურ მდგომარეობას 33 წლის ასაკში აღწევს. ეს პერიოდი ქრისტეს ასაკად იწოდება (ქრისტე 33 წლის ასაკში აღესრულა ჯვარზე). გარდაცვალებისას ადამიანური ბუნების გახლეჩა სულად და ხორცად დროებითი მოვლენაა. ადამიანი მარადისობას სრული ბუნებით იმკვიდრებს, ანუ როგორც სულით, ისე ხორცით. თავდაპირველად სული გადადის მარადისობაში (გარდაცვალებისას); ხოლო უფლის მეორედ დიდებით მოსვლის ჟამს სული კვლავ შეერთდება ხორცთან, მაგრამ ეს ხორცი (მკვდრეთით აღმდგარი) იქნება განსულიერებული (სულს დამორჩილებული, სულის თვისებების მქონე, უკვდავი), ქრისტეს მკვდრეთით აღმდგარი სხეულის მსგავსი და ქრისტეს ასაკისა, ე.ი. 33 წლის. და ეს, მიუხედავად იმისა, თუ რამდენი წლისა გარდაიცვალა ადამიანი (ბავშვობაში თუ ღრმად მოხუცებული).
თუმცა შეუძლებელია ითქვას, თუ როგორი იქნება მკვდრეთით აღმდგარი ადამიანის ხორციელი ბუნება, რამეთუ ამის გამოცდილება არ გაგვაჩნია, ამიტომ გამოთქმა – ვიქნებით 33 წლისა, უფრო სრულყოფილების, ქრისტესადმი მიმსგავსების მაჩვენებელია. შენიშვნის სახით ვიტყვი, რომ აქ საუბარი გადარჩენილ, ანუ ცოცხალ ადამიანზეა.
– გთხოვთ, განგვიმარტოთ, რას ნიშნავს ტერმინები: წინასწარმეტყველი, მოციქული, ღირსი, მოწამე, აღმსარებელი, ნეტარი.
– წინასწარმეტყველი ნიშნავს იმას, "ვინც მომავლის შესახებ ლაპარაკობს". წინასწარმეტყველნი სულიწმინდის ზემოქმედებით ხედავდნენ კაცობრიობის მომავალს, აუწყებდნენ ხალხს მომავალი მესიის შესახებ, ამხელდნენ ადამიანთა ცოდვებს, წინასწარმეტყველებდნენ ხალხებისა და სამეფოთა ბედის შესახებ, განამხნევებდნენ მორწმუნეთ უბედურებისა და განსაცდელის ჟამს.
მოციქულები (გამოგზავნილს ნიშნავს) იყვნენ იესოს მოწაფეები, რომელთაც მსოფლიოს ხალხებს უქადაგეს სახარება. წინასწარმეტყველნი აუწყებდნენ მომავალი მესიის, მაცხოვრის შესახებ, მოციქულები კი – უკვე სოფლად მოსული და განკაცებული მესიის შესახებ.
ღირსად იწოდება ადამიანი, რომელმაც მიაღწია სიწმინდეს მონაზვნურ ღვაწლში, სადაც განსაკუთრებით საჭიროა ნებისყოფა ვნებებთან და დემონურ ძალებთან საბრძოლველად.
მოწამედ იწოდება ადამიანი, რომელმაც სიცოცხლე გასწირა ქრისტესა და სახარებისათვის. მოწამეობა ითვლება "მეორე ნათლობად", რომლის დროსაც მოწამე შენდობას იღებს ყველა ცოდვაზე.
აღმსარებელი არის ის, ვინც დაითმინა ქრისტესთვის წამება, მაგრამ ცოცხალი გადარჩა.
ნეტარი – ამ ტერმინს რამდენიმე მნიშვნელობა აქვს. ნეტარია ქრისტესთვის სალოსი (შეშლილი), ის, ვინც გონებაშეშლილობის მიღმა ფარავდა ამ სოფლისაგან დიდ ღვაწლსა და ღვთისგან მომადლებულ ნიჭებს.
– არსებობს აზრი, თითქოს არსებითი მნიშვნელობა არ აქვს იმას, თუ რომელი აღმსარებლობისა ხარ. ამბობენ, მთავარია გწამდეს და რა მნიშვნელობა აქვს, რას იწამებო. რამდენად სწორია ეს აზრი?
– ამგვარად ფიქრობენ რელიგიისადმი გულგრილი ადამიანები, რომელნიც სარწმუნოებაში მხოლოდ საზოგადოების ზნეობის შემაკავებელ საშუალებას ხედავენ, ან მხოლოდ აუტოთერაპიად მიიჩნევენ. ვისთვისაც სარწმუნოება სიცოცხლის მომცემი ძალა და ღმერთთან მიმყვანებელი გზაა, ვინც საშინელი ტანჯვის ფასად ეძებს ღმერთს, ვინც გაიარა სულიერი განსაცდელი, არავითარ შემთხვევაში მიიღებს ასეთ ათეისტურ რწმენას.
ჭეშმარიტება ერთია. ქრისტემ თქვა: "მე ვარ გზა და ჭეშმარიტება და ცხოვრება. ვერავინ მივა მამასთან ჩემ გარეშე". შეადარო ქრისტე ბუდას, მუჰამედს – ნიშნავს, უარყო სახარება ე.ი. თვით ქრისტე; ნიშნავს, მოიქცე წარმართთა მსგავსად, რომელთაც ააშენეს პანთეონი – ტაძარი ყველა ღმერთისათვის. თუ ყველა რელიგია კარგია, მაშ, რატომღა სწირავდნენ საკუთარ სიცოცხლეს მოციქულები სახარების ქადაგებისათვის, ხოლო მოწამენი ითმენდნენ საშინელ ტანჯვას, დევნას, სიკვდილს?
– საკმარისია თუ არა წელიწადში ერთხელ ზიარება?
– ჩვენ ვნებებით, ცოდვებით ვართ სავსე, ამიტომ აუცილებლად გვჭირდება ეკლესიაში ხშირი სიარული, აღსარება და ზიარება. იმ შეგნებით, რომ წელიწადში ერთხელ ზიარება საკმარისია, ადამიანი თავს იღუპავს.
– შეიძლება თუ არა მოძღვართან ერთხელ ვთქვათ აღსარება, შემდეგ კი რამდენჯერმე აღსარების გარეშე ვეზიაროთ?
– აღსარება უდიდესი საიდუმლოა, რომელიც გულისმიერ სინანულს უნდა მოჰყვეს. ეს ერთმანეთზეა გადაჯაჭვული, ამიტომ ასეთი მიდგომა აღსარებისა და ზიარებისადმი არ შეიძლება. ადამიანმა ყოველი აღსარება ისე უნდა თქვას, თითქოს ეს მისთვის ბოლო იყოს. ქრისტიანი სიკვდილს ყოველთვის თვალებში უნდა უყურებდეს. სიკვდილში, რა თქმა უნდა, სატანჯველი, ჯოჯოხეთი იგულისხმება. არ შეიძლება დაგეგმვა და თქმა: "აღსარებას მერე ვიტყვი", ვინაიდან ეს უკვე ეწინააღმდეგება სახარებისეულ სიტყვებს – "არა განსცადო უფალი შენი". რა გარანტია აქვს ადამიანს, რომ დიდხანს იცოცხლებს. განა სიცოცხლე მის ხელშია?!
– როგორც ვებრძოლოთ მრისხანების ცოდვას?
– ადამიანში მრისხანება ისევე ბუდობს, როგორც ყველა სხვა ვნება. ადამის დაცემის შემდეგ ყველას რატომღაც საკუთარი თავი დიდ რამედ მიაჩნია და ამიტომ მრისხანებს ხოლმე. წმინდა მამები გვეუბნებიან, რომ შეუძლებელია ადამიანი ვინმეს განურისხდეს, თუკი თავი მასზე მეტი არ ეგონება. ეს ამპარტავნების ერთ–ერთი განშტოებაა. უფალს სიმდაბლე უნდა შევთხოვოთ, შეურაცხყოფა დავითმინოთ და აუცილებლად მოგვეცემა სიმშვიდე. მრისხანების ცოდვა იმდენად მძიმეა, რომ წმინდა პავლე მოციქული პირდაპირ გვირჩევს: "ერიდეთ, განრისხებულნი არ გახვიდეთ ამქვეყნიდან და ძმისმკვლელად არ შეირაცხოთ". გვახსოვდეს, ეს სახუმარო საქმე არ არის.
– შეგვიძლია თუ არა მიზნის მისაღწევად დავუშვათ ე.წ. მსუბუქი ცოდვები, მაგალითად, ახლობელს ვუთხარით ტყუილი და ა.შ.
– ყველა ტყუილი ცოდვაა, მცირეც და დიდიც. ადამიანები სწორედ ამაში ცდებიან. მართალია, ცოდვები მომაკვდინებელ და არამომაკვდინებელ ცოდვებად იყოფა, მაგრამ არამომაკვდინებელი ცოდვები მომაკვდინებელი ხდება მისთვის, ვინც იცის, რომ ეს ცოდვაა და მაინც ჩადის მას. აქ ისეთს რას უნდა მივაღწიოთ, რომ მისთვის სასუფეველი დავკარგოთ? ეს ყოველივე ჩვენი სისუსტისაგან გვემართება, ხშირად ცეცხლს ვეთამაშებით. დაშვება იმისა, რომ აი, ახლა ამას ჩავიდენ და მერე მაინც მოვინანიებ, ყოვლად დაუშვებელია.

– რა მნიშვნელობა აქვს დილის და საღამოს ლოცვების კითხვას და უზმოზე სიწმინდეების (ნაკურთხი წყალი, სეფისკვერი) მიღებას?

– ცხოვრების მისტიკური მხარე ქრისტიანისათვის ძალიან მნიშვნელოვანია. სექტანტები სწორედ იმიტომ განსხვავდებიან შინაგანად მართლმადიდებლებისაგან, რომ მისტიკურ მხარეს არ აღიარებენ. ისინი გარეგნულები, ზედაპირულები გახდნენ. სამწუხაროდ, თანდათანობით ეს ჩვენც გვემართება, თუმცა დედა ღვთისა გვიფარავს ქართველებს, საქართველოში დიდი მადლია.
თავისი ბუნებით ნაკურთხი წყალი სრულიად განსხვავდება ჩვეულებრივი წყლისაგან. დილის ლოცვას რომ ადამიანი ყურადღებით წაიკითხავს, მადლი მთელი დღე თან გაჰყვება. მთელი დღე დაცული იქნება და თავადაც გაუკვირდება, ზოგჯერ ისეთი რამისგან დაიფარავს. ღამის ლოცვა კი ქრისტიანს ძილში იცავს. ეს ლოცვები წმინდა მამებმა სულიწმინდით დაწერეს, ბოლოს კი კრებულად გაკეთდა. ყველას ვურჩევდი, ყოველთვის იკითხონ. თუ უძლურებაში არიან, თუნდაც მწოლიარე მდგომარეობაში წაიკითხონ, ოღონდ კი ლოცვა არ გამოტოვონ.

– აზიარებს თუ არა ეკლესია ადამიანს, რომელიც ფსიქიკური დარღვევის გამო თავს ვერ აკონტროლებს და ჩაეთვლება თუ არა ცოდვად, თუ ასეთი ადამიანი თავს მოიკლავს?

– ფსიქიკური აშლილობის მქონეთ ეკლესია აზიარებს. მათ საზიარებლად ეკლესიაში საგანგებო ადგილიც კი არსებობს – სტოა. ხოლო თუ ასეთი ადამიანი თვითმკვლელობას ჩაიდენს, მასზე საეკლესიო წესის აღსრულებაც შეიძლება.

– დილის ლოცვებში მითითებულია, რომ ქრისტიანმა უნდა ილოცოს მფარველი წმინდანის მიმართ. როგორ უნდა გავიგოთ, ვინ არის ჩვენი მფარველი წმინდანი?

– ყველასთვის ცნობილია, რომ მართლმადიდებელი ეკლესია ყოველდღიურად რამდენიმე წმინდანის ხსენებას დღესასწაულობს. საუკუნეების განმავლობაში ტრადიციულად ასე ხდებოდა: როდესაც ბავშვს ნათლავდნენ, იმ წმინდანის სახელს არქმევდნენ, ვისი ხსენებაც იმ დღეს აღინიშნებოდა. იყო გამონაკლისებიც.
ზოგჯერ ისეც ხდებოდა, რომ რომელიმე დიდი წმინდანის პატივსაცემად ჩვილს მის სახელს არქმევდნენ. მაგალითად, დავით გარეჯელის შეწევნით დაბადებულ შვილებს მშობლები დავითს არქმევდნენ და ამით მადლიერებას გამოხატავდნენ. იყო შემთხვევები, როდესაც წმინდა ნიკოლოზის, სხვა დიდი მამების – წმინდა ბასილი დიდის, წმინდა იოანე ოქროპირის შემწეობით ამა თუ იმ ოჯახში დიდი სასწაულები ხდებოდა, ამიტომ მშობლები მადლიერებას გამოხატავდნენ იმით, რომ ჩვილს ამ წმინდანის სახელს არქმევდნენ. ამიტომ მკაცრად განსაზღვრული არ არის, თუ ვისი სახელი უნდა ეწოდოს მონათლულს. თუ ადამიანს ჰქვია ერთი რომელიმე წმინდანის სახელი, მაგრამ, ამავე დროს, სხვა წმინდანის შემწეობასაც გრძნობს ან თვითონ აქვს მის მიმართ სასოება, დილის ლოცვების წარმოთქმისას მას შეუძლია მფარველი წმინდანის გარდა, მისი სახელიც მოიხსენიოს.
უნდა გვახსოვდეს, რომ ყველა წმინდანი ღვთის წინაშეა და ისინი ყველა ქრისტიანისთვის ლოცულობენ.
მანანა ნოდია, ჟურნალი სარკე 


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521320
1521520 online