asdas
ცნობილი ადამიანები
ზურა ხაჩიძე: "მე და ხათუნა ჟორდანიას ახლა ყველაფერი რიგზე გვაქვს"
ზურა ხაჩიძემ ყველას მიუტევა, ვინც აწყენინა
ზურა ხაჩიძე: "მე და ხათუნა ჟორდანიას ახლა ყველაფერი რიგზე გვაქვს"

2014-12-19 00:31:47



ჯგუფ "ქუჩის ბიჭების" წევრი, მომღერალი ზურა ხაჩიძე, ადრინდელი შემართებით იმ საქმეს დაუბრუნდა, რომელსაც მთელი ცხოვრება აკეთებდა და რომელიც ძალიან უყვარს. იმ პერიოდმა, როცა ჯგუფს იძულებითი შემოქმედებითი პაუზა ჰქონდა, გაიარა. ახლა უკვე ხშირად მართავენ საკლუბო კონცერტებს, ახალი რეპერტუარი აქვთ. იმ ადამიანებთან ურთიერთობაშიც "დათბა", ვინც წლების განმავლობაში "ქუჩის ბიჭებს" ჩრდილქვეშ ამყოფებდა ან მათთან ურთიერთობას ერიდებოდა. იმ პერიოდში ზურა ხაჩიძეს ამ ყველაფერზე მძაფრი რეაქცია ჰქონდა, ახლა კი ძველი წყენები დაივიწყა. ურჩევნია, წინ იყუროს, ვიდრე უკან. 35 წლის ასაკში მისი პრიორიტეტები საქმე და ოჯახია.
– ზურა, რა ხდება ჯგუფის ცხოვრებაში, კონცერტები, გამოსვლები გაქვთ?
– როცა შოუბიზნესში ვიწყებდით საქმიანობას, მაშინ ეს სფერო აქტიური და საინტერესო იყო, ყოველ მეორე დღეს კონცერტები იმართებოდა. მაშინდელ დროს ეს ეტაპი ვერ შეედრება, მაგრამ ჩვენ მაინც ვახერხებთ კონცერტების ჩატარებას. ჩვენი სიმღერები რადიოარხებზე რამდენიმე კვირის განმავლობაში ინარჩუნებს პირველობას. გადავიღეთ კლიპი, რომლის პრეზენტაციაც მალე იქნება.
ახლახან გვქონდა სოლო კონცერტი, რომლის პროდიუსერიც გია გუმბერიძე გახლდათ. ბოლო დროს საკლუბო კონცერტებს ხშირად ვმართავთ და ეს არის "ქუჩის ბიჭების" ძირითადი შემოსავლის წყარო. გვაქვს ახალი რეპერტუარი, მაგრამ კონცერტებზე ძველ ჰიტებსაც ვასრულებთ. ამ სოლო კონცერტზე გურამიკო ლომიძე ჩვენ გვერდით არ იყო, ამიტომ ჩვენთან ერთად მუსიკოსმა გელა გნოლიძემ იმღერა. გურამი 2 კვირაში დაგვიბრუნდება და ისევ ერთად გავაგრძელებთ მუშაობას.
– რა ასაკის მსმენელი მოდის თქვენს კონცერტებზე?
– თითქმის ყველა ასაკის მსმენელი გვყავს, მაგრამ კლუბებში ისეთი ფასებია, რომ თინეიჯერები ვერ ახერხებენ სიარულს.
იმის გამო, რომ სახელმწიფო სოციალურად დაუცველი ადამიანების დახმარებისკენაა მიმართული, სისტემატურად ვერ აკეთებს კონცერტებს. ეს ჩემთვის გასაგებია, მაგრამ არის კომერციული კონცერტები, რომელშიც ვმონაწილეობთ. ალბათ დადგება დრო, როდესაც სახელმწიფო აქტიურად ჩაატარებს კონცერტებს. ეტყობა, მათ ჯერ სხვა პრობლემები აქვთ მოსაგვარებელი.
– 35 წლის ხართ. ეს უკვე საშუალო ასაკად ითვლება. ცხოვრების ამ ეტაპზე რა პრიორიტეტები გაქვთ, რა დგას თქვენთვის პირველ ადგილზე?
– ჩემი საქმე, რომელსაც წლებია ვემსახურები და რა დროც უნდა გავიდეს, ასე იქნება. პრიორიტეტული საკითხია, დამოუკიდებლად შევქმნათ რაღაც. ოჯახები გვყავს და მათ მხოლოდ ენთუზიაზმი არ ჰყოფნით. მეც ვცდილობ რაღაცეებს. მთელი ცხოვრება უნდა იბრძოლო იმისთვის, რომ გადარჩე და ყველა კრიზისი გადალახო. იყო კარგი ეტაპებიც და ცუდიც.
– თქვენი საქმიანობით არჩენთ ოჯახს?
– ჩვენი ძირითადი შემოსავალი, რა თქმა უნდა, კონცერტებია, რითიც ოჯახის რჩენა რთულია. ყოველ მეორე დღეს რომ იყოს კონცერტები, ამით ოჯახს უზრუნველვყოფდი, მაგრამ, სამწუხაროდ, ასე არ არის.
– არც ბიზნესი გაქვთ?
– სიმღერის გარდა, განსაკუთრებულს არაფერს ვაკეთებ, სამომავლო გეგმებზე კი ვერ დაგელაპარაკებით. სიმღერის გარდა, დამატებითი შემოსავალი არ მაქვს.
– ახალ მთავრობაში თქვენთვის თანამდებობა არავის შემოუთავაზებია?
– ჯერჯერობით არავის არაფერი შემოუთავაზებია. არც მე მიფიქრია, ამ მიმართულებით მემუშავა. სახელმწიფო სამსახურში ყოფნა რომ მომენდომებინა, ხელისუფლებაში ბევრი მეგობარი მყავს და მუშაობას დავიწყებდი.
– რატომ არ გსურთ, სახელმწიფო მოხელე იყოთ?
– იმიტომ არ მინდა, რომ სხვა საქმეები მაქვს. პროფესიით იურისტი გახლავართ. სახელმწიფო სამსახურში საკუთარ თავს ვიპოვიდი, მაგრამ ჯერჯერობთ თავს ვიკავებ. ამ მხრივ თუ რაიმე სიახლე იქნება, აუცილებლად შეგატყობინებთ.
– იმ პერიოდში, როცა "ქუჩის ბიჭებს" აღარსად ეპატიჟებოდნენ, ამბობდით, რომ ბევრი მეგობარი დაკარგეთ. პოლიტიკური რეალობის შეცვლის შემდეგ "დაბრუნდნენ" შოუბიზნესის მეგობრები?
– შიშის ფაქტორი არსებობდა და ამიტომაც არ მკითხულობდნენ. მაშინ მათ ასეთ საქციელს ძალიან ნეგატიურად ვაფასებდი და მწყინდა კიდეც. მხოლოდ შოუბიზნესის წარმომადგენლები კი არა, ზოგჯერ ნათესავებიც კი ვერ ბედავდნენ ჩვენთან დარეკვას. ეს ახლა განვლილი ეტაპია. ყველას ვერ მოსთხოვ გმირობას. ამ წყენამაც გადამიარა.
– ურთიერთობებიც დათბა?
– ვინც ჩვენს დაბლოკვაში იღებდა მონაწილეობას, ახლა მათთან არაჩვეულებრივი ურთიერთობა მაქვს.
– როგორ შეძელით ეს?
– მიტევებით. მოგეხსენებათ, ეკლესიაში ვარ გაზრდილი და სხვაგვარად არც შეიძლება. შეცდომას ყველა უშვებს და ერთმანეთს უნდა ვაპატიოთ. სათქმელი უნდა ვუთხრათ, მაგრამ უნდა ვაპატიოთ. ამ თემაზე თქვენი ჟურნალის საშუალებით არაერთხელ მილაპარაკია და მათთან პირადადაც მისაუბრია, მაგრამ იმ პერიოდმა გაიარა. სამწუხაროა, რომ ასეთი რამ ხდებოდა, მაგრამ ყველაფერს წერტილი დაესვა.
– თქვენი და ხათუნა ჟორდანიას ურთიერთობა, ოჯახური ცხოვრება როგორ მიედინება, რა სიახლეები ან ცვლილებებია?
– მადლობა ღმერთს, რომ ყველაფერი რიგზეა. იყო კრიზისული პერიოდებიც. ვისაც ოჯახი ჰყავს, ეს არც გაუკვირდება, რადგან, ბუნებრივია, რომ ხან ჩავარდნაა, ხან – წინსვლა. ახლა სტაბილურად ყველაფერი რიგზეა და ყველაფერი ისეა, როგორც ჩვენ გვინდა. პირადი ცხოვრება ინტიმური საკითხია, ამიტომ ამ თემაზე საუბარი მიჭირს. ფაქტია, რომ კარგად ვართ, ერთად ვართ, შვილები გვყავს და ბედნიერად ვცხოვრობთ.
– თქვენი გოგონას, ანასტასიას აღზრდაში აქტიურად მონაწილეობთ?
– ვცდილობ, ღირსეულ, ნამდვილ ქართველ ადამიანად აღვზარდო და კარგი რჩევები მივცე, დანარჩენი მასზეა დამოკიდებული. მკაცრი მამა არ ვარ, ანასტასიასთან ვმეგობრობ. არ შემიძლია დავუყვირო, გავლახო... თუ საჭიროა, შენიშვნას ვაძლევ. მინდა, თავის ქვეყანას, ოჯახს, მეგობრებს გამოადგეს. კარგად სწავლობს, მღერის, კარგი ყოფაქცევა აქვს. ახლახან მითხრა, რომ 52 სმაილი აქვს სკოლაში და თუ გავითვალისწინებთ იმას, რომ სწავლა სექტემბერში დაიწყო, ეს კარგი შედეგია. ვცდილობ, რაღაცეები მეც ვასწავლო და რაღაცეები მეც ვისწავლო მისგან. ამბობენ, რომ ძალიან მგავს გარეგნობით, ხასიათით. ჩემსავით პრინციპული და პასუხისმგებლობის გრძნობის მქონეა.
– ხათუნას ქალიშვილთან, ნინი ქარსელაძესთან, როგორი ურთიერთობა ჩამოგიყალიბდათ?
– როგორი ურთიერთობაც 5 წლის წინ მქონდა, ახლაც იგივენაირი მაქვს. ჩვენ მეგობრები ვართ და ერთმანეთი ძალიან გვიყვარს. ნინის ყოველ კვირას ბენდთან ერთად აქვს კონცერტები. ახალი პროგრამა გააკეთა, საკუთარ თავზე მუშაობს, ცდილობს, სულ ფორმაში იყოს.
ლანა კიკნაძე, ჟურნალი სარკე 


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521864
1522064 online