asdas
ცნობილი ადამიანები
ირაკლი ჩარკვიანის ”მშვიდი ცურვა” გადაცემა ”ჩემი წიგნის” გამარჯვებული გახდა
აღიარება
ირაკლი ჩარკვიანის ”მშვიდი ცურვა” გადაცემა ”ჩემი წიგნის” გამარჯვებული გახდა

2014-11-28 16:35:55



ირაკლი ჩარკვიანის ”მშვიდი ცურვა” გადაცემა ”ჩემი წიგნის” გამარჯვებული გახდა. ფავორიტი ნაწარმოები პროექტის მეოცე ეპიზოდში გამოვლინდა. როგორც გადაცემის წამყვანმა რატი ამაღლობელმა განაცხადა, ეს იყო პირველი ლიტერატურული არჩევნები, რომელიც, მაყურებლის გადაწყვეტილებით, ირაკლი ჩარკვიანმა მოიგო.

”ჩემი წიგნის” გამოსავლენად პროექტის ავტორებმა მთელი საქართველო მოიარეს და მკითხველის საყვარელი ნაწარმოებები მათ მიერ შევსებული ანკეტების საშუალებით გამოავლინეს. დასახელებული წიგნებიდან შეირჩა 60, ხოლო 60-დან 15 ფინალისტი წიგნი. 15-თვე ნაწარმოებს ჰყავდა თავისი წარმდგენი. სწორედ მაყურებლის გადაწყვეტილებით, ”ჩემი წიგნის” გამარჯვებული ირაკლი ჩარკვიანის ”მშვიდი ცურვა”გახდა. 

რატი ამაღლობელი: ირაკლი ჩარკვიანი ჩვენთვის სიმღერაა, ჰარმონიაა, მუსიკაა, სათქმელია და დღეს უკვე მთელს საქართველოში ის არის ტექსტი, ის არის სიტყვა, ის არის ”ჩემი წიგნი”.

ამაღლობელის თქმით, ”მშვიდი ცურვა” პროექტის ფარგლებში უსასყიდლოდ გადაეცემა ყველა სოფლის ბიბლიოთეკას.

გადაცემის ჩაწერას ესწრებოდნენ ირაკლი ჩარკვიანის ოჯახის წევრები _  მამა გელა ჩარკვიანი, მეუღლე ქეთათო და შვილი ნანა.

გელა ჩარკვიანი: _ იმდენად განვიცდი, რომ არ ვიცი, რა ვთქვა. ჩემთვის ის იყო უდიდესი სიხარული და ირაკლისთვის დიდი პატივი რომ ასეთ კომპანიაში მოხვდა მწერლებისა, როგორიც იყო ის 60 წიგნი. აღარ ვლაპარაკობ 15 წიგნზე და პირველობაზე. ეს ჩვენი ეპოქის წიგნია, ალბათ ირაკლის ბიოგრაფია, მისი მთელი შემოქმედება, მუსიკა, პოეზია, აქ ყველაფერი გაერთიანდა. სულ ვეჩხუბებოდი, მეუბნებოდა, ხელოვანის შემოქმედება მისი ცხოვრებაც არის, ის თუ როგორ ცხოვრობს, თუ როგორ გამოიყურება თუ სახლში რას აკეთებ, თუ როგორ დადის, თუ სახლში როგორ იქცევა, მისი შემოქმედების ნაწილიაო, მე კი ვეუბნებოდი, რომ არა, არავითარ შემთხვევაში, შემოქმედება სულ ცალკეა, ვინ განიხილავს შემოქმედს მისი ცხოვრების ჩართვით ამ ყველაფერში-მეთქი. ბოლოს მივხვდი, რომ ის მართალი იყო, ყველაფერი, რაც მან გააკეთა, მართალი იყო. მან მეფე დაირქვა, ჩემი ბიოგრაფიის გამო. მამაჩემს ძალიან დიდი თანამდებობა ეკავა, როცა დანიშნეს, ბებიაჩემს უთქვამს, რაო, კანდიდი მეფე გახდაო?! ასე რომ, რაღაც დროს მეც მეფის შვილი ვიყავი. როდესაც დღეს ახალგაზრდები მხვდებიან ქუჩაში, მაჩერებენ ხოლმე და თუ უნდათ ავტოგრაფი, კი, მაგრამ მე არ დამიწერია არც ეს წიგნი, არც ეს სიმღერა-მეთქი, ვეუბნები. იცით რა წააწერეთ, გელა ჩარკვიანი, მეფის მამაო. ძალიან დიდი საჩუქრია ირაკლის დაბადების დღისთვის ეს გამარჯვება. ერთადერთი, რაც ძალიან მაწუხებს, ის არის, რომ ის ადამიანი, რომელსაც ყველაზე უფრო გაუხარდებოდა მისი წარმატება, დღეს ცოცხალი აღარ არის, ეს არის მისი დედა ნანა, ჩემი მეუღლე.

ქეთათო: _ საოცრად ემოციური წუთებია და რაღა თქმა უნდა, მთელი ჩემი არსებით ვგულშემატკივრობ წიგნს. ოდესმე, იმედი მაქვს, ჩემი ქალიშვილი წაიკითხავს ამ წიგნს და გაიცნობს მამამისს, გაიცნობს ზუსტად ისეთს, როგორიც იყო ირაკლი. დამუნჯებული ვარ სიხარულისგან და უღრმესი მადლობა, ვინც ერთი ზარი მაინც გაუშვა ”მშვიდი ცურვისთვის.”

ირაკლი ჩარკვიანის რომანი ”მშვიდი ცურვა,” როგორც ფორმით, ისე შინაარსით, არაორდინარული ლიტერატურული ნაწარმოებია. რომანში ავტორის და მისი ალტერ ეგოს, მეცამეტე საუკუნის სპარსელი სუფია პოეტის თანამედროვე ინკარნაციის, ცხოვრების ხაზები ერთმანეთს უკავშირდება. ცნობიერების ნაკადს მიმსგავსებული თხრობა დროდადრო წყდება რეალური დროისა და მოგონებების ამოფრქვევებით. სიუჟეტი გამძაფრებულია მოლოდინით, რას იზამს რუმი? გადადგამს თუ არა იმ საბედისწერო ნაბიჯს? ყველას, ვისაც აინტერესებს ჩვენი ქვეყნის უახლოესი წარსული, ორ ისტორიულ ეპოქას შორის წყალგამყოფის წლები, ”მშვიდი ცურვა” მიაწვდის არა ქრონიკას, არამედ ყველაზე მთავარს, პერიოდის სულისკვეთებას, რომელიც წიგნის ფურცლებზე მკაფიოდ აისახება ნიჭიერი, განათლებული თბილისელი ბიჭების ქცევისა და აზროვნების თავისებურებებში. და თუმცა, ერთი შეხედვით, რომანში გადმოცემულია თავად ავტორის თვალით დანახული რეალობა, სინამდვილეში ირაკლი ჩარკვიანი გვიყვება მთელი მისი ”დაკარგული თაობის” განცდებსა და მსოფლხედვას. ეს თაობა ”დაკარგულია” არა მარტო ისტორიული რღვევისა და კატაკლიზმებისაგან დაბნეულობის გამო, იგი დაკარგულია ფიზიკურადაც. დღეისათვის ამ შემოქმედი ახალგაზრდების ჯგუფიდან ცოცხალი თითქმის აღარავინ დარჩა. ავტორის თქმით, ღმერთმა იგი იმისათვის გადაარჩინა, რომ ეს მართალი წიგნი დაეწერა.

”მშვიდი ცურვის” გამოცემას ირაკლი ჩარკვიანი ვერ მოესწრო, მაგრამ წიგნი იმდენად ”მართალი” გამოვიდა, რომ მისი წაკითხვისას ირაკლი ყოველ ჯერზე კვლავ ცოცხლდება თავის სამეგობროსთან ერთად.

ეკა ირემაშვილი, გაზეთი ”ახალი თაობა” 

Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521680
1521880 online