asdas
ცნობილი ადამიანები
ნინო ხომერიკი: ”ჰოროსკოპით ვიცი, რომ ახალი სიყვარული 2015 წელს მეწვევა”
"ასტროლოგიური რუკით ჩემი სიკვდილის დროც კი გამოვთვალე"
ნინო ხომერიკი: ”ჰოროსკოპით ვიცი, რომ ახალი სიყვარული 2015 წელს მეწვევა”

2012-06-12 09:44:13



გადაცემა "ხანუმების" ერთ–ერთი წამყვანი, ნინო ხომერიკი, 22 წლის იყო, როდესაც ასტროლოგიით დაინტერესდა და ეს მეცნიერება უცხოელ ასტროლოგთან შეისწავლა. თავიდან მეგობრებს ეხვეწებოდა, ასტროლოგიურ რუკას შეგიდგენთო, ახლა პირიქითაა, ყველა აქეთ სთხოვს. ნინო დასაოჯახებელ ახალგაზრდებს გადაცემაში რჩევებს აძლევს, თუ ვინ გამოადგებათ მეუღლედ, მაგრამ ალბათ ყველას აინტერესებს, თავად თუ გამოიყენა ეს ცოდნა პირად ცხოვრებაში. აღმოჩნდა, რომ არა. საყვარელი ადამიანისთვის ისიც კი არ უკითხავს, ზოდიაქოთი ვინ იყო. თავისი ასტროლოგიური რუკის მეშვეობით ის კი იცოდა, რომ მათი ურთიერთობა სტაბილური არ იქნებოდა, მაგრამ მაინც გარისკა. ახალ სიყვარულს 2015 წელს ელის და იცის, რომ იმ მამაკაცთან ბოლომდე დარჩება.
– ქალბატონო ნინო, დავიწყოთ იმით, როგორ მოხვდით ტელევიზიაში.
– გადაცემა "ხანუმების" პროდიუსერი ნატო არჩვაძე დამიკავშირდა და ამ შოუს შესახებ მიამბო. მითხრა, თუ ეს ფორმატი თქვენთვის საინტერესო იქნება, ვითანამშრომლოთო. რა თქმა უნდა, ძალიან მომეწონა. ასეთივე გადაცემა რუსეთის ერთ–ერთ არხზე გადის და "დავაი, პაჟენიმსია" ჰქვია. ვფიქრობ, რომ ძალიან კარგი შოუა.
– თქვენ და ზოგადად ასტროლოგია რაში ეხმარებით წყვილს?
– პარტნიორის სწორად შერჩევაში ასტროლოგიური რუკა ძალიან გვეხმარება. ამის მიხედვით შეგვიძლია გავიგოთ, წყვილი რამდენად შეეფერება ერთმანეთს, რა ხანგრძლივობის ურთიერთობა შეიძლება ჰქონდეთ და ა.შ. ყველაფერს რომ თავი დაანებო, შეიძლება გაიგო, ადამიანს საერთოდ აქვს თუ არა ბედი.
– ამის დადგენაც შეიძლება?
– რა თქმა უნდა. შეიძლება ძალიან კარგი გოგო იყო – ლამაზი, კარგი ოჯახიშვილი, მაგრამ ბედი არ გქონდეს და ვერ გათხოვდე.
– ქორწინების წინ ხშირად გთხოვენ ამ რუკის შედგენას?
– ჩემთან ძალიან ხშირად მოდიან და არამარტო ქორწინების წინ. ასე შეიძლება ბიზნესპარტნიორის პოვნა, შვილის გაჩენის დაგეგმვა და ა.შ. ძალიან დიდი ხანია, ამ საქმით ვარ დაკავებული. როცა ეს მეცნიერება შევისწავლე, თავიდან ყველას ვეხვეწებოდი, რუკას შეგიდგენთ–მეთქი, მაგრამ ყველა უარს მეუბნებოდა. ახლა პირიქით არის, აქეთ მეხვეწებიან.
– ცნობილი ადამიანებიც მოდიან თქვენთან?
– კი, ბევრი ცნობილი ადამიანი სარგებლობს ასტროლოგიური პროგნოზით, თუმცა მათ ვინაობას ვერ დავასახელებ.
– როგორ შეეგუეთ თქვენს ტელეპარტნიორებს?
– ლელას და ეკას მანამდე მხოლოდ შორიდან ვიცნობდი. მათგან დადებითი და კარგი მუხტი მოდის. სიმართლე გითხრათ, ამ გადაცემაში იმიტომ მივედი, რომ ასეთი წამყვანები იქნებოდნენ. მათთან ურთიერთობა მიხარია. გადაცემა ძალიან მხიარულია. ჩემი დანიშნულება ის არის, რომ ზუსტი პროგნოზი გავაკეთო, ესა თუ ის ადამიანი იმ კონკრეტულ პიროვნებას შეეფერება თუ არა. ლელა და ეკა წყვილებს რჩევებს თავიანთი შეხედულების მიხედვით აძლევენ.
– ხანდახან ზედმეტად პირდაპირი ხართ. ეს იმიჯი გადაცემას სჭირდება თუ ჩვეულებრივ ცხოვრებაშიც ასეთი ხართ?
– ეს იმიჯი კი არ არის, რეალურადაც ასეთი ვარ. თუ წყვილს ურთიერთობა არ გამოუვა, ჯობია, თავიდანვე დაშორდნენ ერთმანეთს.
– იქნებ თქვენ მიერ შედგენილი რუკა მცდარია და ადამიანები შეცდომით დააშოროთ ერთმანეთს?
– ასეთი შემთხვევა არ მქონია. შეყვარებული ქალი მოვა, მოგისმენს, მაგრამ წავა და მაინც თავისას გააკეთებს. რამდენიმე წლის შემდეგ კი ბრუნდებიან და მეუბნებიან, მე მაინც ის გავაკეთე, რაც არ უნდა გამეკეთებინა და ახლა რა ვქნაო. მერე ერთად ვეძებთ გამოსავალს. საერთოდ სულელური რისკი არ არსებობს ცხოვრებაში, ზუსტად უნდა იცოდე, რატომ რისკავ და დღეს რომ წააგებ, ხვალ რას მოიგებ. არსებობს ისეთი შეცდომები, რომლებიც იმიტომ უნდა დაუშვა, რომ მომავალში გაგიმართლოს.
– ცოტა რთულია, ამაში გაერკვე... პროფესიით ვინ ხართ?
– ჟურნალისტი ვარ. ამ პროფესიით დიდი ხნის წინ ვმუშაობდი, მაგრამ მაშინ რატომღაც ჩავთვალე, რომ ამ სფეროში ჩემი თავი ვერ ვიპოვე. დიპლომატიური აკადემიაც დავამთავრე. ცხოვრებაში მქონდა პერიოდი, როდესაც ბევრი კითხვა გამიჩნდა, მაინტერესებდა, ჩემ ირგვლივ რატომ ხდებოდა რაღაც–რაღაცეები. ერთხელ შემთხვევით გავიცანი ქალი, რომელმაც მითხრა, რომ იყო ასტროლოგი. ეს ქალი ქართველი არ არის, სანკტ–პეტერბურგში ცხოვრობს. მითხრა, შემიძლია ასტროლოგია გასწავლო, ოღონდ ჯერ მათემატიკა უნდა შეისწავლოო. ეს მეცნიერება 27 ათასი წლის წინ ჩამოყალიბდა და ზუსტი იმიტომ ჰქვია, რომ არითმეტიკული გამოთვლა ხდება.
ასტროლოგია დაახლოებით ოთხწელიწადნახევარში შევისწავლე. ეს არის საკმაოდ რთული მეცნიერება, თუ არ მოგწონს, არ გიყვარს და ინტერესი არ გაქვს, ვერ ისწავლი. ზუსტად ამის სწავლის პროცესში დავკარგე მეგობრები, რადგან მაინტერესებდა, სად იდგა მერკური და არა – მეგობრული ამბები. ასტროლოგიას ვერ ამოწურავ, რადგან გალაქტიკაში ყოველთვის რაღაც ხდება. ეს მეცნიერება რომ შევისწავლე, მაშინ დაახლოებით 22 წლის ვიქნებოდი. დავიწყე ასტროლოგიური რუკის გაკეთება, პირველად კი საკუთარ თავს შევუდგინე, ყველაფერი, რაც შეიძლებოდა, გამოვთვალე, მათ შორის – სიკვდილის დროც.
– ესეც შეგიძლიათ უთხრათ ადამიანს?
– რა თქმა უნდა, მაგრამ თუ რა ასაკში შეიძლება მოკვდეს, ამას არავის ვეუბნები. თუ უბედური შემთხვევის საფრთხე არსებობს, ვაფრთხილებ და მას შეუძლია, ხიფათი თავიდან აიცილოს. ვეუბნები პერიოდს, როცა შეიძლება რაიმე ცუდი გადახდეს თავს. ვაძლევ რჩევას, თუკი გამოსავალს ვერ ვხედავ, ვეუბნები, რომ დატოვოს ქვეყანა. ისეთ ადგილს ვურჩევ, რომელიც ჩვენი საათობრივი ზონიდან იქნება განსხვავებული.
– საკუთარი ჰოროსკოპის შედგენის მერე რა შეიცვალა თქვენში?
– ძალიან შევიცვალე, მოთმენა ვისწავლე. სწორად დავიწყე აღქმა სიტუაციის, ადამიანების. ოქროს შუალედი ვიპოვე ცხოვრებაში. ადრე ძალიან სულსწრაფი ადამიანი ვიყავი, ამ მეცნიერებამ კი მოთმინების უნარი შემძინა. სტრატეგიების დასახვა ვისწავლე. ცხოვრება ჭადრაკის დაფას ჰგავს, სვლას რომ აკეთებ, წინასწარ იცი, იქიდან რა შეიძლება გამოვიდეს. იმპულსური ხასიათის ვიყავი და ესეც ჩავაქრე ჩემში.
– ოდესმე ხიფათი აგიცილებიათ თავიდან?
– ასეთი სიტუაცია მრავლად მქონია, მაგალითად, ერთხელ ძალით გავიკეთე ბრმა ნაწლავის ოპერაცია. ექიმი მოვატყუე, რომ ძალიან მტკიოდა. ის კაცი არ მიჯერებდა, მე კი ოთხჯერ მივედი. ასტროლოგიურად ვხედავდი, რომ სხეულის ქვედა ნაწილებში სავალალო პრობლემა უნდა გამჩენოდა და უფრო ცუდი რამ მარტივად ავირიდე თავიდან – ბრმა ნაწლავის ოპერაცია გავიკეთე.
– რამდენად ნორმალურია, ჰოროსკოპზე ზედმეტად დამოკიდებული რომ ხდება ადამიანი, ეს მას ცხოვრებაში ხელს არ უშლის?
– მე არ ვარ იმ ტიპის ადამიანი, რომელიც 24 საათი ჰოროსკოპს უკირკიტებს ან რაიმეზე არის დამოკიდებული, მიუხედავად იმისა, რომ ყველაფერზე არსებობს ასტროლოგიურად პასუხი. შეიძლება ერთი წელი ისე გავიდეს, რომ ჩემს ჰოროსკოპში არ ჩავიხედო. დროც ვიცი, სადამდე შეიძლება ამ სიმშვიდემ გასტანოს.
– თქვენ ვინ ხართ ზოდიაქოთი?
– ქალწული ვარ, 25 აგვისტოს დავიბადე, თუმცა ჩემი ინდივიდუალური ნიშანი არის ლომი. ვცდილობ, ორივე ნიშნიდან კარგი ავიღო. მე მაქვს როგორც ქალური, ასევე ცოტა კაცური ხასიათიც. ბუნებით თავისუფალი ადამიანი ვარ, არ მიყვარს შეზღუდვა, ადამიანს ყოველთვის ვაძლევ არჩევანის საშუალებას.
– როცა ცხოვრების თანამგზავრს ირჩევდით, გაარკვიეთ მისი ჰოროსკოპი?
– როდესაც უეცრად მოდის რაღაც გრძნობა, მაშინ, პირველ რიგში, გულისთქმას მიჰყვები და მერე იყურები ასტროლოგიურ რუკაში. თუ დამიჯერებთ, ჩემი პარტნიორისთვის რუკა არ შემიდგენია. შეგნებულად არ ვკითხე, რომელ რიცხვში იყო დაბადებული. ზუსტად ვიცოდი, რომ მერე ჩემი ტვინი ამუშავდებოდა და ამ გრძნობებს გათიშავდა. ჰოროსკოპიდან გამომდინარე, ზუსტად ვიცოდი, რამდენ ხანს მექნებოდა ურთიერთობა მასთან, ვიცოდი, რომ ეს არ გაგრძელდებოდა დიდხანს. ამიტომაც არ მჭირდებოდა მისი ჰოროსკოპის გაკეთება. ამ შემთხვევაში დიდი როლი ითამაშა პრინციპმა – მედალს ორი მხარე აქვს. ვიცოდი, რომ ამ ურთიერთობას ჩემი ანუკა მოჰყვებოდა, ამიტომაც ვარჩიე, რომ ეს ნაბიჯი გადამედგა. ისიც ვიცი, როდის მოვა მეორე სერიოზული გრძნობა.
– როდის?
– ჩემი პირველი ქორწინება დასრულდა. დღეს პასიური პერიოდი მაქვს სასიყვარულო თავგადასავლებში და ველოდები ახალ გრძნობას, რომელიც 2015 წელს მეწვევა. ამ ყველაფერს "ჰეფი ენდი" მოჰყვება.
– არც მომავალ პარტნიორს შეეკითხებით დაბადების თარიღს?
– მას უკვე შევეკითხები იმიტომ, რომ ეს ურთიერთობა იქნება ბოლო და სტაბილური. ზუსტად ვიცი, რომ მასთან ერთად მომიწევს დაბერება. ამიტომ უნდა ვიცოდე, ვინ არის და რა არის, რაზე არის წამსვლელი...
– პირველი ქორწინების დროს ხომ იცოდით, რომ ეს არ იქნებოდა სტაბილური ურთიერთობა, რატომ გადადგით ეს ნაბიჯი?
– ვიცოდი და ამიტომაც არ ვკითხე ჰოროსკოპი. ანუკას გამო გავრისკე. ეს არ იყო შეცდომა. 2015 წელს ჩემს ცხოვრებაში ახალ რომეოს ველოდები.
– განშორება როგორ გადაიტანეთ?
– ამისთვის მზად ვიყავი. მიზეზი ის იყო, რომ იმ ადამიანთან ურთიერთობა აღარ მინდოდა. ყველაფერი მუდმივი ხომ არ არის? ბოლოს და ბოლოს ადამიანი კვდება და რატომ არის გასაკვირი, რომ ვიღაცის მიმართ გრძნობა გაქრეს? ვცდილობ, ყველანაირი პრობლემა გადავჭრა და ამაში ასტროლოგია მეხმარება. მარტივად და ადვილად არ ვცხოვრობ.
– ხშირად აიგივებენ ასტროლოგიას მკითხაობასთან...
– არა, ეს არ არის მკითხაობა, ბანქოს გაშლა. ახლა აღარავინ აიგივებს მკითხაობასთან, ეს კულტურა შემოვიდა, ხალხმა გაიგო, რომ ეს არის მეცნიერება.
– ძვირადღირებული ფუფუნებაა თქვენთან ასტროლოგიური რუკის შედგენა?
– არა, 60 ლარი ღირს.
– ლელა წურწუმიას და ეკა კახიანს თუ შეუდგინეთ პირადი ჰოროსკოპი?
– რა თქმა უნდა, ორივეს შევუდგინე. ძალიან საინტერესო ადამიანები არიან. ახლა ქალბატონი ლელას ეპოქა დადგა – მერწყულების პერიოდი. მისთვის ძალიან წარმატებული იქნება. ჩვენ ახალ ეპოქაში გადავედით, რომელიც დაახლოებით 25 საუკუნე გაგრძელდება. სხვათა შორის, ძალიან კარგი ეპოქაა – სიმშვიდის, თავისუფლების. ადამიანებში სულიერება უნდა ამაღლდეს იმიტომ, რომ მერწყულები სწორედ ასეთები არიან.
– თავისუფალ დროს რას საქმიანობთ? როგორი ხართ შვილთან, მეგობრებთან ურთიერთობისას?
– ფაქტობრივად თავისუფალი დრო არ მაქვს. რაც შეეხება შვილს, კვირაში ერთ დღეს მთლიანად მას ვეკუთვნი. პრინციპში, ანუკა გავაჩინე და მას მერე დედაჩემი ზრდის, მე მას მატერიალურად უზრუნველვყოფ. მეგობრებთან ერთად ვისვენებ და ვცდილობ, ისეთი გარემოცვა შევარჩიო, სადაც არ მისვამენ კითხვებს, ახლა ჩემს მეათე სახლში რა ხდებაო. ძალიან მიყვარს შვილთან ერთად სეირნობა. მიუხედავად იმისა, რომ ორწლინახევრისაა, ძალიან ჭკვიანი გოგოა. მისთვის საუკეთესო საჩუქარი წიგნებია. ანუკა ძალიან კარგ პერიოდშია დაბადებული, მშვილდოსანია, აღმავლობის პერიოდში დაიბადა, დროზე ადრე მოევლინა ქვეყანას – შვიდი თვის და ორი კვირის.
– ესეც წინასწარ იცოდით?
– კი, რა თქმა უნდა. ყველაფერმა კარგად ჩაიარა. ანუკა ისეთ კარგ პერიოდში იბადებოდა, არაფერზე ვნერვიულობდი.
– თქვენი ოჯახის წევრებზე ყველაფერი წინასწარ რომ იცით, ეს არ გაშინებთ?
– მერე რა, რომ იცი, რა ელით? ეს თავიდან უფრო იყო შოკისმომგვრელი. ასეთ სიტუაციაში ყოველთვის გამოსავალს ვეძებ.
ლანა კიკნაძე


Content on this page requires a newer version of Adobe Flash Player.

Get Adobe Flash player

სიახლეები
დღის სიახლეები
რა მოსწონთ თქვენ მეგობრებს

Alternative content

1521760
1521960 online